ހއ. ހޯރަފުށި، ޑީންސްވިލާގޭ، ހާޝިމް މުހައްމަދު، (44އ) ގެ މަރާއި ގުޅިގެން އާއިލާއިން ކަންބޮޑުވުންތަކެއް ފާޅުކޮށްފައި ވާތީ އެކަން ބަލަމުންދާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، މައްސަލައިގެ ތަހުގީގު ނިންމާފައި ވަނިކޮށް އާއިލާއިން ކަންބޮޑުވުން ތަކެއް ހިއްސާކޮށްފައި ވާތީ އެ ކަންބޮޑުވުންތަކާ ގުޅިގެން ބަލަންޖެހޭ ކަންކަން ބެލުމުގެ މަސައްކަތް ފުލުހުން ގެންދަނީ ކުރަމުން ކަމަށެވެ. 

ހއ. ހޯރަފުށި، ޑީންސްވިލާގޭ، ހާޝިމް މުހައްމަދު، (44އ)، މާފަންނު ކޮޅު ގެއެއްގެ ސިޑި ކައިރީގައި މަރުވެފައި އޮއްވައި ފެނިފައި ވަނީ، 2 ޖެނުއަރީ 2022 ވަނަ ދުވަހުގައެވެ. އެދުވަހު ފުލުހުން ބުނެފައި ވަނީ، ހާޝިމްގެ މަރާއި މެދު ޝައްކުތަކެއް ހުރުމުން އެކަން ބަލައި ތަޙްޤީޤު ކުރަމުންދާކަމަށެވެ. އެހެން ނަމަވެސް އޭގެ ދެދުވަސް ފަހުން، 4 ޖެނުއަރީގައި، ފުލުހުން ވިދާޅުވީ އެ މަރުގައި ޖިނާއީ އަމަލެއް އަދި އިހުމާލެއް ފާހަގަ ކުރެވިފައި ނުވާ ކަމަށެވެ. ފުލުހުންގެ އިދާރާއިން އެދުވަހު ވިދާޅުވީ، މާފަންނު ގެއެއްގެ ތެރޭގައި މީހަކު ވެއްޓިފައި އޮތް ކަމުގެ ރިޕޯޓު ފުލުހުންނަށް ލިބުނީ ޖެނުއަރީ 2 ވަނަ ދުވަހުގެ ރޭ 21:03 ހާއިރުގައި ކަމަށާއި، ފުލުހުން އެތަނަށް ދިޔައިރުވެސް އޭނާ އޮތީ ނިޔާވެފައި ކަމަށް، ފުލުހުންނާއި އެކު ސީންއަށް ދިޔަ ޑޮކްޓަރުން ވިދާޅުވެފައިވާ ކަމަށެވެ.

ހާޝިމްގެ މަރުގެ މައްސަލައަށް 2 އަހަރު ވީއިރުވެސް އެމައްސަލައިގެ ތަޙްޤީޤު ނިމުނު ގޮތެއް ފުލުހުން ހާމަކޮށްފައެއް ނުވެއެވެ. އެހެން ނަމަވެސް ހާޝިމްގެ ވިޔަފާރީގެ މައްޗަށް ވެރިވެގަނެ އޮޅުވާލައިގެން މުދާތައް އަތުލާފައިވާ ކަމަށް ބުނެ، ހާޝިމްގެ މަރާއި މެދު އާއިލާއިން ތުހުމަތު ކުރާ ބަނގުލަދޭޝް މީހާ އާއި މިސަރުކާރުގެ ޑެޕިއުޓީ މިނިސްޓަރު އަދި ސަލްމާން ރަސްގެފާނު މިސްކިތުގެ އިމާމު، އަބްދުލްޖަލީލް އިސްމާއިލަށް އާއިލާއިން ކުރި ތުހުމަތުތަކާއި ގުޅިގެން ފުލުހުންނާއި ނޫސްވެރިން ސުވާލު ކުރަން ފެށުމުން، ފުލުން މިއަދު ވިދާޅުވީ ހާޝިމްގެ މަރުގެ ތަޙްޤީޤު ފުލުހުން ނިންމާފައިވާ ކަމަށެވެ. އެހެން ނަމަވެސް އެތަޙްޤީޤުގައި ފުލުހުން ނިންމި ގޮތެއް ފުލުހުންގެ އިދާރާއިން ހާމައެއް ނުކުރައްވައެވެ.

ފުލުހުންގެ އިދާރާއިން ވިދާޅުވީ، ހާޝިމް މުޙައްމަދުގެ މަރުގެ މައްސަލައިގެ ތަހުގީގަށް ހާޝިމް މުޙައްމަދުގެ ފޯނު ފުލުހުންގެ ބެލުމުގެ ދަަށަށް ގެންދިޔަ ކަމަށެވެ. އަދި ފުލުހުންގެ ތަހުގީގަށް ބޭނުންވާ ތަހުލީލުތަކަށްފަހު ފޯނު ވާނީ އާއިލާއާ ހަވާލުކޮށްފައި ކަމަށާއި، އިތުރު އެއްވެސް އިލެކްޓްރޯނިކް އާލާތެއް މި މައްސަލައިގެ ތަހުގީގަށް ގެނެސްފައެއް ނުވާކަމަށް ފުލުހުންގެ އިދާރާއިން ވިދާޅުވިއެވެ.