ދ. ކުޑަހުވަދޫ ކައިރީގައި އޮއްވައި ރޯވި ހަމްދު ދޯނީގައި ރޯފި އަލިފާން ނިވިއްޖެ ކަމަށް ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ހާމަކުރައްވާފައިވާ ގޮތުގައި، ގާތްގަނޑަކަށް 10 ގަޑިއެއްހާ އިރު ވަންދެން އެދޯނީގައި ރޯވެފައި ހުރި އަލިފާން ނިވާލުމަށް މަސައްކަތް ކުރެވުނު އިރު، ހަވީރު ދޯނީގައި ރޯވެފައި ހުރި އަލިފާން ނިވުނީ ދޯނި އަޑިޔަށް ގޮސްގެން ކަމަށެވެ.

ފުުލުހުންގެ އިދާރާއިން ވިދާޅުވެފައިވާ ގޮތުގައި ހާދިސާގައި މައުލޫމާތު ފުލުހުންނަށް ލިބިފައި ވަނީ ހެނދުނު 6:30 ގައެވެ. އެމްއެންޑީއެފް ކޯސްޓްގާޑަށް މައުލޫމާތު ލިބުނީ 7:20 ގައި ކަމަށް އެމްއެންޑީއެފުން ވިދާޅުވެފައިވެއެވެ. އެމްއެންޑީއެފުން ހާމަކުރައްވާފައިވާ ގޮތުގައި ދޯނީގައި އަލިފާން ރޯވީ އެދޯނީގެ އިންޖީނު ރޫމުގައެވެ. ދޯނި އަޑިޔަށް ދިޔައީ އަލިފާންގަނޑު ފެތުރި ދޯނީގެ ފަހަތުގައި އަނދައި ހުލިވުމުންނެވެ.

އެމްއެންޑީއެފުން ވިދާޅުވީ އެދޯނި ދަތުރުކުރީ 4 މީހުން ކަމަށާއި އެންމެންގެ ހާލު ރަނގަޅު ކަމަށެވެ. އެހެން ނަމަވެސް ފުލުހުން ވިދާޅުވީ އެދޯނިން ދަތުރު ކުރީ 5 މީހުން ކަމަށާއި އެންމެންގެ ހާލު ރަނގަޅު ކަމަށެވެ. 

އަލިފާން ރޯވެ އަޑިޔަ ދިޔަ ދޯންޏަކީ، ފެންބަރުކޮށްގެން ކަނޑިންމަ ރިޒޯޓަކަށް ދަތުރު ކުރި ދޯންޏެއް ކަމުގައި އެމްއެންޑީއެފުން ވިދާޅުވި އިރު އެދޯންޏަކީ މާލެއިން ބޮނަކުއާ ފެންފުޅި ތަކެއް ހިފައިގެން ދ. އަތޮޅު ނިޔާމަ ރިސޯޓަށް ދަތުރު ކުރި ދޯންޏެއް ކަމުގައި ފުލުހުން ވިދާޅުވިއެވެ.

މިހާދިސާ ފުލުހުންނާއި ސިފައިންވެސް ދަނީ ތަޙްޤީޤު ކުރަމުންނެވެ.