ދ. ކުޑަހުވަދޫ ކައިރިން ދޯންޏެއްގައި ރޯވި އަލިފާން އަދިވެސް ނިވާ ނުލެވޭ ކަމުގައި އެމްއެންޑީއެފުން ވިދާޅުވެއްޖެއެވެ.

އެމްއެންޑީއެފުން ވިދާޅުވީ، އަލިފާނުގެ ހާދިސާގެ ރިޕޯޓް އެމްއެންޑީއެފަށް ލިބުނީ މިއަދު ހެނދުނު، 7:20 ހާއިރުގައި ކަމަށެވެ. 

އަލިފާން ރޯވެފައި ވަނީ، ކަނޑިންމަ ރިސޯޓަށް ފެން ހިފައިގެން ދަތުރުކުރަމުން ދިޔަ "ހަމްދު" ނަމަކަށް ކިޔާ މުދާ އުފުލާ ދޯންޏެއްގެ އިންޖީނު ރޫމުގައި ކަމަށާއި، އެމްއެންޑީއެފް ސެންޓްރަލް އޭރިއާ ކޮމާންޑް، ދ.ކުޑަހުވަދޫ ފަޔަރ ސްޓޭޝަނަށް މިއަދު ހެނދުނު 7:20 ހާއިރު އެމައުލޫމާތު ލިބުމާއެކު، އެ ފަޔަރ ސްޓޭޝަނުގެ ފަޔަރ ފައިޓަރުން ދަނީ އަލިފާން ނިވުމުގައި ހަރަކާތްތެރިވަމުން ކަމުގައި އެމްއެންޑީއެފުން ވިދާޅުވިއެވެ. އަދި "ހަމްދު" ދޯނީގައި ރޯވެފައިވާ އަލިފާން ނިންވާލުމަށް ދ.ކުޑަހުވަދޫ ފަޔަރ ސްޓޭޝަނުގެ ފަޔަރ ފައިޓަރުންނަށް އެހީތެރިވުމަށް، އެމްއެންޑީއެފް ސެންޓްރަލް އޭރިއާ ކޮމާންޑް، ފ.ނިލަންދޫ ފަޔަރ ސްޓޭޝަންގެ ފަޔަރ ފައިޓަރުން ވެސް ދަނީ މިއަދު 11:00 ހާއިރުން ފެށިގެން އެ ސަރަހައްދުގައި ހަރަކާތްތެރިވަމުން ކަމުގައި އެމްއެންޑީއެފުން ވިދާޅުވިއެވެ.

އެމްއެންޑީއެފުން ވިދާޅުވީ، "ހަމްދު" ދޯނީގައި ރޯވެފައިވާ އަލިފާންގެ 80 ޕަސެންޓް މިހާރު ވަނީ ކޮންޓްރޯލް ކުރެވިފައިވާ ކަމަށެވެ. އެ ދޯނިން ދަތުރުކުރަމުން ދިޔައީ 4 މީހުން ކަމަށާއި، އެންމެންގެ ހާލު ރަނގަޅު ނަމަވެސް، ދޯނި ވަނީ ވަރަށް ބޮޑަށް އަނދާފައި ކަމުގައި އެމްއެންޑީއެފުން ވިދާޅުވިއެވެ.

ފުލުހުންގެ އިދާރާއިން މައުލޫމާތު ދިންގޮތުގައި އެ ދޯނީގައި އަލިފާން ރޯވި ކަމުގެ ރިޕޯޓް ފުލުހުންނަށް ލިބިފައި ވަނީ، ހެނދުނު 6:30 ގައެވެ.