މާލޭގެ މަގުތައް މަތީގައި ޤަވާއިދާއި ޚިލާފަށް ޕާކުކޮށްފައި ވާ އުޅަނދުތައް ނެގުމުގެ މަސައްކަތް ހުއްޓާނުލައި ކުރިޔަށް ގެންދާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، މާލޭގެ މަގުތަކުގައި ގަވާއިދާ ހިލާފަށް ޕާކުކޮށްފައި ހުރި އުޅަނދުތައް ނެގުމުގެ މަސައްކަތް ފުލުހުންދަނީ ކުރަމުން ކަމަށާއި، އެ މަސައްކަތަކީ މާލޭގެ މަގުތަކަކީ އަމާން ރައްކާތެރިތަނަކަށް ހަދައި މަގުތައް ތަރުތީބުކުރުމަށް ކުރަމުންދާ މަސައްކަތުގެ ތެރެއިން ކުރަމުންދާކަމެއް ކަމަށެެވެ.

މާލޭގެ މަގުތަކުގައި ޤަވާއިދާއި ޚިލާފަށް ޕާކުކޮށްފައިވާ އުޅަނދުތައް ނެގުމުގެ މަސައްކަތް ފުލުހުން ފަށާފައިވާތާ ގިނަ ދުވަސްތަކެއް ވެއްޖެއެވެ. މިގޮތުން އާއްމުންނަށާއި ދުއްވާއެއްޗިއްސަށް ދަތިވާގޮތަށް މަގުތަކުގައި ޕާކުކޮށްފައި ހުންނަ ގިނަ އުޅަނދުތަކެއް ފުލުހުން ވަނީ ނަގާފައެވެ. އަދި ޓޯވ ކުރާ އުޅަނދުތަކަށް ގެއްލުންތައް ލިބޭތީ އެކަމުގައި އާއްމުން ކަންބޮޑުވުންފާޅުކުރަމުންވެސް ގެންދެއެވެ.

ރައީސުލްޖުމްހޫރިއްޔާގެ ރިޔާސީ ވަޢުދުތަކުގެ ތެރޭގައި ޕާކު ކުރާނެ ޖާގަ ނުދައްކައި، ޕާކިން ވަޔަލޭޝަންސް ސްޓިކަރ ނުޖެހުން ހިމެނޭތީ، ފުލުހުން ވަނީ، ޓްރެފިކް ވަޔަލޭޝަން ސްޓިކާ ޖެހުން ހުއްޓާލައި، އުޅަނދުތައް ޓޯވކުރުމުގެ މަސައްކަތް ފަށާފައެވެ.