ސަރުކާރެއްގެ ޒިންމާ އަކީ މުސާރަ ދިނުން އެކަނި ކަމަަށް ދެކިގެން ނުވާނެ ކަމުގައި ރައްޔިތުންގެ މަޖިލީހުގެ ހުޅުމާލެ ދެލުނު ދާއިރާގެ މެމްބަރު އަޙްމަދު ޝަމްހީދު ވިދާޅުވެއްޖެއެވެ.

މެމްބަރު ޝަމްހީދު މިހެން ވިދާޅުވީ، ފިޝަރީޒް މިނިސްޓްރީގެ ޓީމެއް، ގއ. ދެއްވަދޫއިން ބޭރުކޮށްލި މައްސަލައާއި ގުޅުވައި އެކްސްގައި ކުރެއްވި ޕޯސްޓެއްގައެވެ. ޝަމްހީދަކީ، ދެއްވަދޫއަށް ނިސްބަތްވާ ބޭފުޅެކެވެ. ހުޅުމާލެ ދާއިރާގެ ރައްޔިތުންގެ މަޖިލީހުގެ 3 ގޮނޑިވެސް ފުރުއްވަމުން ގެންދަވަނީ ދެއްވަދޫއަށް ނިސްބަތްވާ ބޭފުޅުންނެވެ.

މެމްބަރު ޝަމްހީދު އެކްސްގައި ކުރެއްވި ޕޯސްޓުގައި ވިދާޅުވީ،  ސަރުކާރެއްގެ ޒިންމާ އަކީ މުސާރަ ދިނުން އެކަނި ކަމަަށް ދެކިގެން ނުވާނެ ކަމަށާއި، މަސްވެރިނާއި އަދި އެހެނިހެން އިންޑަަސްޓްރީ ތަކުގައި މަސައްކަތް ކުރާ އާއިލާތަކަށް ދޭންޖެހޭ ފައިސާ ނުލިބުމުގެ ސަބަބުން އެއާއިލާތަށް ވަނީ ބިކަވެފައި ކަމަށެވެ. އަދި މިފެންނަނީ ރައްޔިތުންގެ ކެތްތެރިކަން ކޮޅުން ލާންފެށީމަ ފެންނާނެ މަންޒަރުތަކުގެ ކުޑަމިންވަރެއް ކަމުގައި މެމްބަރު ޝަމްހީދު ވިދާޅުވިއެވެ.

މަސްވެރިން ބާނާ މަހަށް 48 ގަޑިއިރުގެ ތެރޭގައި ފައިސާ ދިނުމަކީ މިސަރުކާރުގެ ރިޔާސީ ވަޢުދެކެވެ. މިސަރުކާރު ފެށިގެން މިހާތަނަށްވެސް ރާއްޖެ ހިނގަމުން އަންނަނީ އިޤުތިޞާދީ ވަރަށް ބޮޑު ދަތިކަމެއްގެ ތެރޭގައި ކަމަށްވުމާއިއެކު މަސްވެރިން ކިރުވާމަހަށް އެކަށީގެންވާ އަވަސްމިނެއްގައި ފައިސާ ނުދެވުމަކީ ސަރުކާރަށް ކުރިމަތިވެފައި އޮތް އެންމެ ބޮޑު ގޮންޖެހުމެވެ.