ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރައްވާ ރަސްމީ ދަތުރުފުޅެއްގައި، އަންނަ މަހު އެޤައުމަށް ވަޑައިގަންނަވާނެ ކަމުގައި އިންޑިއާގެ މީޑިއާތަކުން ރިޕޯޓްކޮށްފިއެެވެ.

ރައީސުލްޖުމްހޫރިއްޔާ އިންޑިއާއަށް ވަޑައިގެންވުމަށް ހަމަޖެހިފައި ވަނީ އޮކްޓޫބަރު މަހުގެ ދެވަނަ ހަފްތާގައި ކަމަށްވެސް އިންޑިއާގެ ނޫސްތަކުން ރިޕޯޓްކޮށްފައިވެއެވެ. ރައީސުލްޖުމްހޫރިއްޔާ ވަރަށް އަވަހަށް ވަޑައިގަންނަވާނެ ކަމުގައި ރައީސުލްޖުމްހޫރިއްޔާގެ އޮފީހުންވެސް ވަނީ ހާމަކުރައްވާފައެވެ. ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު ހީނާ ވަލީދު ކުރިން ވިދާޅުވީ، ރައީސުލްޖުމްހޫރިއްޔާ އިންޑިއާއަށް ދަތުރުފުޅު ކުރައްވާނެ ތާރީޚެއް ކަނޑައެޅުމާއި މެދު ދެ ޤައުމުގެ ވެރިންގެ މެދުގައި މަޝްވަރާތައް ހިނގަމުންދާ ކަމަށެވެ. 

ރައީސުލްޖުމްހޫރިއްޔާ އިންޑިއާއަށް ކުރައްވާ މިދަތުރުފުޅަކީ، އިންޑިއާ އާއި ދިވެހިރާއްޖޭގެ ގުޅުން އިތުރަށް ބަދަހި ކުރައްވައި، ދެޤައުމުގެ ދެމެދުގައި ހުރި މައްސަލަތަކާއި ކަންބޮޑުވުންތަކާއި ގުޅޭ ގޮތުން މަތީފެންވަރުގެ މަޝްވަރާތައް ކުރައްވާނޭ ދަތުރުފުޅެއް ކަމުގައި މީޑިއާއިން ރިޕޯޓުކޮށްފައިވެއެވެ. ދިވެހިރާއްޖެއާ އިންޑިއާއާ ދެމެދު އޮތް ޒަމާންވީ އެކުވެރިކަމުގެ ގާތްގުޅުން އެންމެ ބޮޑަށް ހީނަރުވެގެން ގޮސްފައި ވަނީ، މިވެރިކަމުގައެވެ. ވެރިިކަމަށް ވަޑައިގެންނެވުމުގެ ކުރިންނާއި ވެރިކަމަށް ވަޑައިގެންނެވުމުގެ ފަހުންވެސް ވެރިކަމުގެ ފުރަތަމަކޮޅުގައި ސަރުކާރުގެ އަމަލުތައް ހުރި ގޮތުން ދެޤައުމުގެ ގުޅުމަށް ނޭދެވޭ އަސަރުތައް ވަނީ ކޮށްފައެވެ. ރައީސް ޑރ. މުޢިއްޒުގެ ރިޔާސީ ކެމްޕޭނުގެ މައިގަނޑު އަމާޒަކަށް "އިންޑިއާ އައުޓް" ހައްދަވާފައި އޮތް އިރު އެކަމުގެ ސަބަބުން ދެ ޤައުމުގެ ގުޅުން ވަރަށް ބޮޑަށް ހީނަރުވެެގެން ދިޔައެވެ.