އިޒްރޭލުން ހަނގުރާމަ ކުރަނީ ހުރިހާ މުސްލިމުންނާއި ދެކޮޅަށް ކަމަށާއި ހުޅަނގުގެ ޤައުމުތަކުން މަސައްކަތް ކުރަނީ އެކަން އޮޅުވާލުމަށް ކަމުގައި ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫނު ޢަބްދުލްޤައްޔޫމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ހިޒްބުﷲގެ ލީޑަރު ޙަސަން ނަސްރުﷲ އަވަހާރަކޮށްލެވިއްޖެ ކަމަށް އިޒްރާއީލުން ރަސްމީކޮށް އާއްމު ކުރިތާ ކުޑައިރުކޮޅެއް ފަހުން އެކްސްގައި ކުރެއްވި ޕޯސްޓެއްގައެވެ.

ކުރީގެ ރައީސް މައުމޫނުގެ ޕޯސްޓުގައި ވިދާޅުވީ، އިސްރާއީލުން ހަނގުރާމަ ކުރަނީ ހަމައެކަނި ޙިޒްބު ﷲ ނޫންކަމަށާއި، އެއީ ހުރިހާ ޢަރަބީންނާއި އަދި  ހުރިހާ މުސްލިމުންނާއި ދެކޮޅަށް ކުރާ ހަނގުރާމައެއް ކަމަށެވެ. އަދި އެކަން ހުޅަނގުގެ ޤައުމުތަކުން އޮޅުވައިލިޔަ ނުދެއްވުމަށް އެދިވަޑައިގަންނަވާކަމުގައިވެސް ރައީސް މައުމޫން ވިދާޅުވިއެވެ.

އިޒްރާއީލުން ވަނީ އިއްޔެ ލުބުނާނުގެ ބެއިރޫތުގެ ދެކުނުގެ ސަރަހައްދަކަށް ކާޕެޓްބޮމުގެ ހަމަލާއެއް ދީފައެވެ. އެހަމަލާގައި ބެއިރޫތުގެ ދެހިޔާގައި މީހުން ދިރިއުޅެމުން އައި 9 އިމާރާތް ހިމެނޭ ބްލޮކެއް އެއްކޮށް މުޅިން ފުނޑުފުނޑުވެގެން ދިޔަ ކަމުގައި، ލުބުނާނުގެ ރަސްމީ ފަރާތްތަކުން ޚަބަރުދީފައިވެއެވެ. އެހަމަލާގައި އެތައް ބަޔަކު މަރުވެފައި ވާނޭ ކަމަށް ލަފާ ކުރެވޭ ކަމަށާއި، މަރުވި މީހުންގެ އަދަދު އަންދާޒާކޮށްލަންވެސް ނޭނގޭ ކަމުގައި، ލުބުނާނުގެ ރަސްމީ ފަރާތްތަކުން ވަނީ ބުނެފައެވެ.