ޕީއެސްއެމްގެ ޚިޔާނާތުގެ މައްސަލަ ފުލުހުންނަށް ރިޕޯޓުކޮށްފައިވާ ކަމަށާއި، އެމައްސަލަ ފުލުހުންގެ ފަރާތުން އޭސީސީއަށް ފޮނުވާފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، ޕީއެސްއެމްގެ ޚިޔާނާތުގެ މައްސަލަ ފުލުހުން، އޭސީސީއަށް ފޮނުވާފައި ވަނީ، ކޮރަޕްޝަނުގެ މައްސަލަތައް ބެލުމުގެ އިޙްތިޞާސް އޮތް ތަނަކީ، އޭސީސީ ކަމަށްވާތީ ކަމަށެވެ.

ޕީއެސްއެމްގެ ކޮރަޕްޝަނާއި ގުޅޭ މައްސަލަތަކެއް މީޑިއާގައި އެންމެ ފުރަތަމަ ހާމަކުރެއްވީ އެކުންފުނީގެ ކުރީގެ މެނޭޖިންގ ޑައިރެކްޓަރ ޒީނާ ޒާހިރުއެވެ. އަދި އޭނާ މެނޭޖިންގ ޑިރެކްޓަރުގެ މަޤާމުގައި ހުންނެވި އިރު އެކުންފުނީގެ،  ފައިނޭންސް ޑިރެކްޓަރު، އަހުމަދު ހަނީފު މަޤާމުން ސަސްޕެންޑްކޮށް އޭނާގެ މައްސަލަ ކަމާއި ބެހޭ ފަރާތްތަކަށްވެސް ހުށައެޅިއެވެ.

ބުރާސްފަތި ދުވަހު އާއްމުކުރި، ޕީއެސްއެމްގެ އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، ޕީއެސްއެމްއިން ޑޮލަރު ގަތުމަށް ހިންގި މުއާމަލާތްތަކުގައި ގިނަ އަދަދެއްގެ ފައިސާ ގެއްލިފައިވާ ކަމަށެވެ. އަދި ޑޮލަރު ގަތުމުގެ މުއާމަލާތްތަކުގައި، އެކުންފުންޏަށް 9 މިލިޔަނަށްވުރެ ގިނަ ރުފިޔާ ގެއްލިފައިވާ ކަމުގައިވެސް އޮޑިޓް ރިޕޯޓުގައި ފާހަގަކޮށްފައިވެެއެވެ.