ރާއްޖެއަށް ފަތުރުވެރިންގެ ގޮތުގައި އަންނަ ކޮންމެ ފަތުރުވެރިއަކަށްވެސް ރާއްޖެއިން މަރުޚަބާ ކިޔާނެ ކަމަށާއި، ޔަހޫދީއަކަސް އަދި ނަޞާރާއަކަށް ވިޔަސް ރާއްޖެއަށް ފަތުރުވެރިއެއްގެ ގޮތުގައި އާދެވޭނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވެފައި ވަނީ، ޕްރިންސްޓަން ޔުނިވާސިޓީގެ ޑީންސް ލީޑާޝިޕް ސީރީޒްގައި ދެއްކެވި ވާހަކަފުޅުގައެވެ. ރައީސުލްޖުމްހޫރިއްޔާ މިގޮތަށް ވިދާޅުވީ، އިޒްރޭލު މީހުން ރާއްޖެއަށް އެތެރެވުން ހުއްޓުވުމަށް ސަރުކާރުން ނިންމި ނިންމުމާއި ގުޅޭ ގޮތުން ކުރެވުނު ސުވާލުތަކަށް ޖަވާބުދެއްވަމުންނެވެ. ރައީސުލްޖުމްހޫރިއްޔާ ވިދާޅުވީ، އެއްވެސް މީހަކީ ވަކި ދީނެއްގެ މީހަކަށް ވެގެނެއް ރާއްޖެއަށް ފަތުރުވެރިއެއްގެ ގޮތުގައި އައުން މަނާ ނުކުރާކަމަށެވެ. އެހެން ނަމަވެސް އިޒްރޭލު މީހުންނަށް ރާއްޖެ އެތެރެވުން މަނާކުރުމަށް ނިންމާފައި ވަނީ، އިޒްރޭލުން ފަލަސްޠީނުގެ މުސްލިމުންނާއި ދެކޮޅަށް ދެމުން އަންނަ ހަމަލާތަކާއި ދެކޮޅު ހެދުމުގެ ގޮތުގައި އެކަމުގައި ރާއްޖެއަށް އެޅެން ހުރި ފިޔަވަޅުތައް އެޅުމުގެ ގޮތުން ކަމުގައި ރައީސުލްޖުމްހޫރިއްޔާ ވިދާޅުވެފައިވެއެވެ.

އިޒްރޭލުގެ ޕާސްޕޯޓު މަނާ ކުރާނެކަން ސަރުކާރުން އިއުލާނު ކުރީ ޖޫން 2، 2024،ގައި ބޭއްވި ވަޒީރުންގެ މަޖިލީހުގެ ބައްދަލުވުމުގައި އެކަން ނިންމެވުމަށްފަހުގައެވެ. އޭގެ ކުރިން އިދިކޮޅު އެމްޑީޕީންވެސް އޮތީ، އިޒްރޭލު ޕާސްޕޯޓުގައި ރާއްޖެއަށް އެތެރެވުން މަނާކުރުމާއި ގުޅޭ ބިލެއް ރައްޔިތުންގެ މަޖިލީހަށް ހުށައަޅާފައެވެ.

އިޒްރާއީލް ޕާސްޕޯޓް ގެންގުޅޭ މީހުންގެ ތެރޭގައި މުސްލިމުންވެސް ހިމެނެއެވެ. އަދި ނަޞާރާއިންވެސް ހިމެނެއެވެ. އެހެން ނަމަވެސް ޔަހޫދީންގެ ތެރެއިން އެތައް މިލިއަން ބަޔަކީ އަދިވެސް އިޒްރާއީލުގެ ރައްވެހީންނެއް ނޫނެވެ.