ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކުވެރި ދައުލަތްތަކުގެ އާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގަތުމަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު، އެމެރިކާގެ ނިއުޔޯކުން ފުރާވަޑައިގެންފިއެވެ.

ރައީސްގެ ދަތުރުފުޅާއި ގުޅޭ ގޮތުން، ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި އެމަނިކުފާނު މާލެއަށް ވަޑައިގަންނަވާނީ، މާދަމާގެ ވަގުތެއްގައެވެ.

ރައީސުލްޖުމްހޫރިއްޔާ، ނިއުޔޯކުން މާލެއަށް ވަޑައިގަންނަވާނީ، ދުބާއީގައި ޓްރާންސިޓްކުރެއްވުމަށް ފަހުގައެވެ. 

ރައީސުލްޖުމްހޫރިއްޔާ އެމެރިކާގެ ނިއުޔޯކަށް ކުރެއްވި މިދަތުރުފުޅަކީ، 79 ވަނަ ސެޝަން (ޔޫއެންޖީއޭ 79) ގައި ބައިވެރިވެވަޑައިގަތުމަށް ކުރެއްވި ރަސްމީ ދަތުރުފުޅެކެވެ. އެމަނިކުފާނު ވަނީ، އދ.ގެ އާއްމު މަޖިލީހުގައި ތަޤުރީރު ކުރައްވައި، ރާއްޖޭގެ ބަޔާން އިއްވަވާފައެވެ. މީގެ އިތުރުން، އދ. ގެ ސަލާމަތީ މަޖިލީހުގައިވެސް އެމަނިކުފާނު ތަޤުރީރު ކުރައްވާފައިވެއެވެ.

މީގެ އިތުރުން ބައްދަލުވުމުގައި ހަވާސާގައި ރައީސް ވަނީ، އދ، ގެ ސެކްރެޓަރީ ޖެނެރަލްގެ އިތުރުން، ދުނިޔޭގެ ބައެއް ޤައުމުތަކުގެ އިސްވެރިންނާއިވެސް ބައްދަލު ކުރައްވާފައެވެ. އަދިއެމެރިކާގައި ދިރިއުޅޭ ދިވެހީންނާއިވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައްދަލު ކުރެއްވިއެވެ. 

އދ.ގެ އާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގަތުމަށްޓަކައި، ރައީސުލްޖުމްހޫރިއްޔާ ޑޮކްޓަރ މުޢިއްޒު އެމެރިކާގެ ނިއުޔޯކަށް ފުރާވަޑައިގަތީ މިހިނގާ ސެޕްޓެމްބަރ މަހުގެ 20 ވަނަ ދުވަހުގެ ރޭ، އިރާކޮޅުގެ ވަގުތެއްގައެވެ.