ހިޒްބުﷲގެ ލީޑަރު ޙަސަން ނަސްރުﷲ އަވަހާރަކޮށްލުމަށްޓައި އިޒްރާއީލުން ބެއިރޫތަށް ވައިގެ ހަމަލާތަކެއް ދީފިއެވެ. 

ބެއިރޫތުގައި އާއްމުން ދިރިއުޅޭ އިމާރާތްތަކަށް އިޒްރޭލުން ދިން ހަމަލާތަކުގައި، ހިޒްބުﷲގެ ލީޑަރު ޙަސަން ނަސްރުﷲ މަރުވެފައިވާ ކަމަށް އިޒްރާއީލުގެ ބައެއް ފަރާތްތަކުން ވަނީ ރިޕޯޓްކޮށްފައެވެ. އެހެންނަމަވެސް ހިޒްބުﷲގެ ފަރާތުން އެކަމާއި ގުޅޭ ބަޔާނެއް ނުނެރޭތީ ޙަސަން ނަސްރުﷲ އަވަހާރަވިކަން ކަށަވަރެއް ނޫނެވެ.

އިޒްރާއީލުގެ އަސްކަރިއްޔާއިން ބުނެފައި ވަނީ، ބެއިރޫތުގެ ދެކުނުގައިވާ ދަހިޔާގައި ހުންނަ ހިޒްބުﷲގެ ކޮމާންޑް ސެންޓަރަށް ވައިގެ ހަމަލާތަކެއް ދީފައިވާ ކަމަށެވެ. އެހެން ނަމަވެސް އަލްޖަޒީރާ އާއި ބެއިރޫތުގެ ނޫސްވެރިން ރިޕޯޓްކޮށްފައިވާ ގޮތުގައި އިޒްރާއީލުގެ ހަމަލާތައް އަރާފައި ވަނީ، ބެއިރޫތުގައި އާއްމުން ދިރިއުޅޭ އިމާރާތަކަށެވެ.

ފާއިތުވި ފަސް ދުވަހުގެ ތެރޭގައި އިޒްރޭލުން ވަނީ، ލުބުނާނަށް ބޮންއަޅައި 700އަށް ވުރެ ގިނަ މީހުން މަރާލާފައެވެ. އޭގެ ކުރިން ހިޒްބުﷲގެ މުވާޞަލާތީ ވިޔުގަ ހަލާކުކޮށްލުމަށް އިޒްރޭލުން ވަނީ، ޕޭޖަރުތަކުގައި ގޮވާތަކެތި ހަރުކޮށް ގޮއްވާލައި، ހިޒުބުﷲގެ ގިނަ އަދަދެއްގެ މެމްބަރުން ޒަޚަމްކޮށްލާފައެވެ.