އިޒްރާއީލުން ލުބުނާނަށް ފާއިތުވި ދެދުވަހު ދިން ހަމަލާތަކުގައި އެކަނިވެސް ލުބުނާނުން 50 ވުރެ ގިނަ ކުޑަކުދިން މަރުވެފައިވާ ކަމުުގައި ޔުނިސެފުން ބުނެފިއެވެ.

އދ.ގެ ކުޑަކުދިންގެ ޙައްޤުތަކާއި ބެހޭ ގޮފި، ޔުނިސެފުން ވަނީ، އިޒްރާއީލުން ލުބުނާނަށް ދެމުން އަންނަ ހަމަލާތަކާއި ގުޅިގެން ކަންބޮޑުވުން ފާޅުކޮށްފައެވެ. 

ޔުނިސެފުން ވަނީ، ލުބުނާނުގައި މިފާއިތުވި އަހަރުތަކުގައި ހިނގަމުން އަންނަ ހަމަނުޖެހުންތަކާއި ހަނގުރާމައިގެ ސަބަބުން، އެތައް ހާސް ބަޔަކު މަރުވެ، އެތައް ބަޔަކު ގެދޮރު ގެއްލި، އުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބި، ރައްޔިތުންގެ އާންމު ދިރިއުޅުމުގައި ހީވެސް ނުކުރާ ވަރުގެ ބިރުވެރިކަމެއް އުފެދިފައިވާކަމަށެވެ. އަދި އެކަމުގެ ސަބަބުން ކުޑަކުދިންނަށް ކުރާ އަސަރު ބޮޑުކަން ޔުނިސެފުން ވަނީ ފާހަގަކޮށްފައެވެ.

ޔުނިސެފުން ހާމަކޮށްފައިވާ ގޮުތުގައި، ހޯމަ ދުވަހުން ފެށިގެން އިޒްރާއީލުން ދެމުން އަންނަ ހަމަލާތަކުގައި 4 ދުވަހުގެ ތެރޭގައި 50 ކުޑަކުދިން މަރުވި އިރު، އެއީ 2006 ވަނަ އަހަރު ދިން ހަމަލާތަކަށްވުރެ ވެސް ނިސްބަތުން މަތީ އަަދަދެކެވެ. 2006 ވަނަ އަހަރު 33 ދުވަސްވަންދެން އިޒްރާއީލުން ލުބުނާނަށް ދިން ހަމަލާތަކުގައި، 400 ވުރެ ގިނަ ކުޑަކުދިން މަރުވިއެވެ.

އިޒްރާއީލުން ދެމުން އަންނަ ހަމަލާތަކުގައި ގިނަ އަދަދެއްގެ ކުޑަކުދިން މަރުވަމުން އަންނަކަން ފާހަގަކުރައްވައި، ލުބުނާނުގައި ހުންނަވާ ޔުނިސެފްގެ ރެޕްރެސެންޓޭޓިވް ވެސް ވަނީ ކަންބޮޑުވުންފާޅު ކުރައްވާފައެވެ. 

ލުބުނާން ޑިޒާސްޓަރ ރިސްކް މެނޭޖްމަންޓް ޔުނިޓުން ހާމަކޮށްފައިވާ ގޮތުގައި، ފާއިތުވި 72 ގަޑިއިރުގެ ތެރޭގައި އެކަނިވެސް، 70،000 އަށްވުރެ ގިނަ މީހުން ވަނީ، ގެދޮރު ދޫކޮށް ނުކުމެފައެވެ. އިޒްރޭލުން ހޯމަ ދުވަހު ދޭން ފެށި ހަމަލާތައް ދިނުމުގެ ކުރިންވެސް، 110000 ވުރެ ގިނަ މީހުން ގެދޮރު ގެއްލިފައި ތިބި އިރު، އޭގެ ތެރެއިން ކުޑަކުދިންގެ އަދަދަކީ 39000އެވެ.

ޔުނިސެފުން ހާމަކޮށްފައިވާ ގޮތުގައި ހަނގުރާމައިގައި ހާލުގައިޖެހޭ ކުޑަކުދިންނާއި އާއިލާތަކަށް، 39 މިލިއަން ޑޮލަރުގެ އެހީ ބޭނުން ވާއިރު، މިހާތަނަށް ލިބިފައި ވަނީ އެންމެ 7.6 މިލިއަން ޑޮލަރުގެ އެހީއެވެ.