ހުޅުމާލެ ފޭސް 2 ގައި ހަދަމުން ގެންދާ ކެޓް ޝެލްޓާއަށް ބޭނުންވާ ތަކެތި ގަތުމަށް، ކުންފުންޏަކާއި ހަވާލުކޮށްފިއެވެ.

މާލޭ ސިޓީ ކައުންސިލުން ހާމަކުރައްވާފައިވާ ގޮތުގައި، ހުޅުމާލެ ފޭސް 2 ގައި ޤާއިމް ކުރެވެމުންދާ ކެޓްޝެލްޓަރ އަށް ބޭނުންވާ އިކުއިޕްމެންޓްސް އާއި މެޓީރިއަލްސް ހޯދުމަށް ހަވާލުކޮށްފައި ވަނީ، ރެޕިޑް އިންޖިނިއަރިންގ ސޮލިއުޝަން ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކަށެވެ. އެކުންފުންޏަށް، އެމަސައްކަތް ހަވާލުކޮށްފައި ވަނީ، 210,036.61 ރުފިޔާއަށް ކަމުގައިވެސް ސިޓީ ކައުންސިލުން ހާމަކުރައްވާފައި ވެއެވެ.

މާލޭ ސިޓީކައުންސިލުން ހާމަކޮށްފައިވާ ގޮތުގައި މިހާރު އަމާޒު ހިފާފައި ވަނީ މިއަހަރުގެ ނޮވެމްބަރު މަހުގެ ތެރޭގައި ކެޓް ޝެލްޓާގެ މަސައްކަތް ނިންމައި ހުޅުވުމަށެވެ.

ހުޅުމާލެ ފޭސް 2 ގައި ހަދާ ކެޓް ޝެލްޓާގެ މަސައްކަތް ނިމުމުން މާލެ އާއި ހުޅުމާލެ އަދި ވިލިމާލޭގެ މަގުތައް މަތީގައި އުޅޭ ބުޅާތައް އެތަނަށް ބަދަލުކުރާނެއެވެ.