މިސަރުކާރުގެ ވަރަށް ކުރީކޮޅު، މިސަރުކާރުގައި ޑެޕިއުޓީ މިނިސްޓަރުންގެ މަޤާމުގައި ތިއްބެވި ބޭފުޅުންތަކެއް، އިންޑިއާގެ ބޮޑުވަޒީރު ނަރެންދުރަ މޯދީއަށް ފުރައްސާރަކޮށް ދެއްކި ވާހަކަތައް ބަލައި ނުގަންނަ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ޕްރިންސްޓަން ޔުނިވަރސިޓީއަށް ޒިޔާރަތް ކުރައްވައި، އެ ޔުނިވަރސިޓީގެ ސްކޫލް އޮފް ޕަބްލިކް އެންޑް އިންޓަރނޭޝަނަލް ޕޮލިސީގެ "ޑީންސް ލީޑަރޝިޕް ސީރީސް"ގައި ދެއްވި ތަޤުރީރުގައެވެ. 

ރައީސުލްޖުމްހޫރިއްޔާގެ ތަޤުރީރުގައި ވަނީ، އިންޑިއާ އާއި ރާއްޖޭގެ ގުޅުމުގެ މައްޗަށާއި، އިންޑިއާކަނޑުގެ ހަމަޖެހުމާއި ސަލާމަތްތެރިކަން ދެމެހެއްޓުމުގައި ދިވެހިރާއްޖެއިން ކުރަމުން އަންނަ މަސައްކަތްތަކުގެ މައްޗަށްވެސް އަލިއަޅުއްވާލައްވައި ވާހަކަފުޅު ދައްކަވާފައެވެ. 

ރައީސުލްޖުމްހޫރިއްޔާ ވިދާޅުވީ، މޯދީއަސް ފުރައްސާރަކުރެއްވި އެމަނިކުފާނުގެ ސަރުކާރުގެ ޑެޕިއުޓީ މިނިސްޓަރުންނަށް ފިޔަވަޅު އެޅުއްވި ކަމަށެވެ. އަދި ލީޑަރެއްވިޔަސް އަދި އާދައިގެ މީހަކަށް ވިޔަސް، އެއްވެސް މީހަކާއި ދިމާއަށް އެގޮތަށް މުޚާތަބު ކުރުން ބަލައި ނުގަންނަކަމަށާއި، ކޮންމެ އިންސާނަކީވެސް އަބުރުވެރި މީހެއް ކަމަށެވެ.

ޔޫތު މިނިސްޓްރީގެ ޑެޕިއުޓީ މިނިސްޓަރުންގެ ގޮތުގައި ތިއްބެވި، މަލްޝާ ޝަރީފާއި، މަރިޔަމް ޝިއުނާ އިންޑިއާގެ ބޮޑު ވަޒީރު ނަރެންދުރަ މޯދީއަކީ، ޕަޕެޓެއް ކަމަށާއި، ޓެރަރިސްޓެއް ކަމަށް ބުނެ ސޯޝަލް މީޑިއާގައި ވާހަކަ ދައްކާފައެވެ. އެކަމާއި ގުޅިގެން އިންޑިއާގެ މީޑިއާގައި ރާއްޖޭގެ މީޑިއާގައި އެޚަބަރުތައް ފެތުރިފައި ވަނިކޮށް، ރައީސުލްޖުމްހޫރިއްޔާ ވަނީ އެ ދެމީހުން މުސާރަ ލިބޭ ގޮތަށް ސަސްޕެންޑް ކުރައްވާފައެވެ. އަދި ގާތްގަނޑަކަށް 9 މަސްދުވަހު މުސާރަ ލިބޭ ގޮތަށް ސަސްޕެންޝަންގައި ތިއްބެވުމަށް ފަހުގައި އެދެމީހުން މަޤާމުން އިސްތިއުފާ ދެއްވާފައި ވަނީ މި ސެޕްޓެމްބަރު މަހުގައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވަނީ އިންޑިއާ އާއި އެކު މިސަރުކާރުން ގުޅުން ބަދަހިކުރުމަށް ކުރައްވަމުން ގެންދަވާ މަސައްކަތްޕުޅުތަކުގެ މައްޗަށްވެސް އަލިއަޅުއްވާލައްވައި ވާހަކަފުޅު ދައްކަވާފައެވެ.