ބައިނަލްއަޤުވާމީ ޤާނޫނުތައް ނެގެހެއްޓުމުގައި އދ. ސަލާމަތީ މަޖިލިސް ވަނީ ނުކުޅެދި ފެއިލްވެފައި ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

އެމަނިކުފާނު މިހެން ވިދާޅުވީ، އދ.ގެ ސަލާމަތީ މަޖިލީހުގައި ދިވެހިރާއްޖޭގެ ބަޔާން ހުށައަޅުއްވައި ދެއްކެވި ވާހަކަފުޅުގަައެވެ. 

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، ޣައްޒާގައި ހިންގަމުންދާ ހަމަނުޖެހުންތަކަށް އިޝާރާތްކުރައްވާ ރައީސުލްޖުމްހޫރިއްޔާ ވިދާޅުވީ، ސަލާމަތީ މަޖިލީހަށް ފެންނަ ފަށުގައި ނަސްލުނައްތާލުމުގެ ޢަމަލުތައް ނިއުޅެމުންދާއިރުވެސް، ބައިނަލްއަޤުވާމީ ޤާނޫނު ނެގެހެއްޓުމުގައި އެ މަޖިލިސް ނުކުޅެދިފައިވާކަމަށެވެ. ފަލަސްޠީނުގެ ނަސްލު ނައްތާލުމަށް އިސްރާއީލުން ހިންގާ ޤަތުލުއާންމު ހުއްޓުވުމަށް ސަލާމަތީ މަޖިލީހަށް ލިބިފައިވާ ބާރު ކަނޑުވާލަނީ ވީޓޯގެ ބާރުންކަމަށާއި، އަދަބެއް ނުދެވި، އަނިޔާވެރި އިސްތިޢުމާރު ދެމެހެއްޓުމަށް އިސްރާއީލަށް ފުރުޞަތު ފަހިކޮށްދެނީވެސް ވީޓޯގެ ބާރުންކަމަށް، އެމަނިކުފާނު ވިދާޅުވިއެވެ.

އދ. ގެ ސަލާމަތީ މަޖިލީހުގައި ވީޓޯކުރުމުގެ ބާރު އޮތީ ފަސް ޤައުމަކަށެވެ. އޭގެ ތެރޭގައި ހިމެނެނީ، ޗައިނާ، ފްރާންސް، ރަޝިޔާ، އިނގިރޭސި ވިލާތް އަދި އެމެރިކާއެވެ. އިޒްރޭލުން މެދުއިރުމަތީގައި ހިންގާ ޤަޠުލު އާއްމުތައް ހުއްޓުވުމަށް އދ. ސަލާމަތީ މަޖިލީހަށް ހުށައެޅޭ ޤަރާރުތައް ވީޓޯކުރަމުން އަންނަނީ އެމެރިކާއިންނެވެ.