ޖުލައި 23، 2012ގައި ކ. ކާށިދޫގައި ޑިއުޓީގައި ހުއްޓައި ވަޅިއަކުން ހަމަލާދީ މަރާލި، ޕޮލިސް ސަރޖަންޓް އާދަމް ހަލީމްގެ މަރާލުމުގެ ކުށް ސާބިތުވެ، ކްރިމިނަލްކޯޓާއި ހައިކޯޓުން އޭނާ މެރުމަށް ކުރި ޙުކުމް ސްޕްރީމްކޯޓުން ބާޠިލްކުރުމުން، މިހާރު އޭނާ ބަންދުގައި ބަހައްޓާފައި ހުރީ ރިމާންޑް ޖަލުގައި ކަމުގައި މޯލްޑިވްސް ކަރެކްޝަނަލް ސަރވިސްއިން ބުނެފިއެވެ.

ސަމާޙުގެ މައްޗަށް ކުށް ސާބިތު ނުވާކަމަކަށް ދިވެހިރާއްޖޭގެ ސްޕްރީމްކޯޓުން ޙުކުމެއް ނުކުރެއެވެ. އެހެން ނަމަވެސް ދިވެހިރާއްޖޭގެ ސްޕްރީމްކޯޓުން ދަށު ކޯޓާއި ހައިކޯޓުގެ ޙުކުމް ބާޠިލްކޮށް އަންގާފައި ވަނީ އެމައްސަލަ އަލުން ބެލުމަށެވެ. އެހެންވެ ސަމާޙް މިނިވަންވީ ކަމަށް ބައެއް މީިޑިއާތަކުން ޚަބަރު ފެތުރި ނަމަވެސް ކޯޓުން އަންގާފައި ވަނީ އޭނާގެ މައްޗަށް އުފުލިފައިވާ ދައުވާއާއި ގުޅިގެން އޭނާ ރިމާންޑް ޖަލަަށް ބަދަލު ކުރުމަށް ކަމުގައި އެނގިފައިވެއެވެ.

އިސްތިއުނާފުގައި ސަމާޙުގެ ފަރާތުން ފާހަގަކޮށްފައި ވަނީ، އޭނާ ފުރަތަމަ މަރުހަލާގައި ކުށަށް އިޢުތިރާފްވެފައި ވަނީ، ފުލުހުން އޭނާއަށް ބިރުދައްކައި އަނިޔާކުރުމުގެ ސަބަބުން ކަމަށެވެ. އަދި ސަމާޙުގެ ފަރާތުން އެދިފައި ވަނީ އެމައްސަލަ އަލުން ބެލުމަށް ކްރިމިނަލް ކޯޓަށް އަންގައި އަމުރުކޮށްދިނުމަށެވެ.