ޖުލައި 23، 2012ގައި ކ. ކާށިދޫގައި ޑިއުޓީގައި ހުއްޓައި ވަޅިއަކުން ހަމަލާދީ މަރާލި، ޕޮލިސް ސަރޖަންޓް އާދަމް ހަލީމްގެ މަރާލުމުގެ ކުށް ސާބިތުވި، މުހައްމަދު ސަމާހުގެ މައްސަލަ އަލުން ބެލުމަށް ކްރިމިނަލް ކޯޓުން އަލުން ބެލުމަށް އަންގައި ދިވެހިރާއްޖޭގެ ސްޕްރީމްކޯޓުން ޙުކުމް ކޮށްފިއެވެ.

އާދަމް ހަލީމް މަރާލުމުގެ ކުށް، ކ. ކާށިދޫ، ސުވާސާގޭ މުހައްމަދު ސަމާހުގެ މައްޗަށް ސާބިތުވާކަމަށް ކަނޑައަޅައި އޭނާ މެރުމަށް ކްރިމިނަލް ކޯޓުން ހުކުމްކުރީ، 2013 ވަނަ އަހަރުގެ ތެރޭގައެވެ. އޭގެ 7 އަހަރު ފަހުން، ސެޕްޓެމްބަރު 30، 2020 ގައި ދިވެހިރާއްޖޭގެ ހައިކޯޓުންވެސް ނިންމީ، ސަމާޙްގެ މައްޗަށް ކްރިމިނަލްކޯޓުން އިއްވި ޙުކުމް ރަނގަޅު ކަމަށެވެ. އަދި ކްރިމިނަލްކޯޓުން ސަމާޙުއަށް މަރުގެ އަދަބު ދިނުމަށް އިއްވި ޙުކުމް އެކޯޓުން ވަނީ ދަމަހައްޓާފައެވެ.

ކްރިމިނަލްކޯޓުން ސަމާޙް މެރުމަށް ކުރި ޙުކުމާއި، އެޙުކުމަށް ތާއީދުކޮށް ޙުކުމް ދަމަހައްޓައި، ސެޕްޓެމްބަރު 30، 2020 ގައި ދިވެހިރާއްޖޭގެ ހައިކޯޓުން ކުރި ޙުކުމް، ބާޠިލްކޮށް ދިވެހިރާއްޖޭގެ ސުޕްރީމްކޯޓުން ޙުކުމް ކުރީ މިއަދުއެވެ.

އިސްތިއުނާފުގައި ސަމާޙުގެ ފަރާތުން ފާހަގަކޮށްފައި ވަނީ، އޭނާ ފުރަތަމަ މަރުހަލާގައި ކުށަށް އިޢުތިރާފްވެފައި ވަނީ، ފުލުހުން އޭނާއަށް ބިރުދައްކައި އަނިޔާކުރުމުގެ ސަބަބުން ކަމަށެވެ. އަދި ސަމާޙުގެ ފަރާތުން އެދިފައި ވަނީ އެމައްސަލަ އަލުން ބެލުމަށް ކްރިމިނަލް ކޯޓަށް އަންގައި އަމުރުކޮށްދިނުމަށެވެ.