ބޫޓާނުގައި މިހާރު ކުރިއަށްދާ 17 އަހަރުން ދަށުގެ ސާފް ޗެމްޕިއަންޝިޕްގެ ގްރޫޕްގެ ދެވަނަ މެޗުގައި ބަނގުލަދޭޝްއާ އެއްވަރުކޮށް ޕޮއިންޓެއް ހޯދާ، މުބާރާތުގައި އިތުރަށް ކުރިޔަށް ދިއުމުގެ އުއްމީދު ރާއްޖޭގެ ގައުމީ ފުޓުބޯޅަ ޓީމުން އައުކޮށްފިއެވެ.

ބަނގުލަދޭޝްއާ ދެކޮޅަށް ކުޅުނު މެޗުގައި ރާއްޖޭގެ ޓީމުން އެއްވަރުކޮށްފައިވަނީ އެ ޓީމުން ގޯލެއް ޖަހާފައިވަނިކޮށް، މެޗު ނިމެން 11 މިނެޓަށްވެފައި ހުއްޓައެވެ. ބަނގުލަދޭޝްއިން ލީޑު ނެގީ މެޗުގެ 49 ވަނަ މިނެޓުގައެވެ. އަދި ރާއްޖޭގެ ޓީމުން މެޗުގެ ނަތީޖާ ހަމަހަމަކުރީ މެޗުގެ 79 ވަނަ މިނެޓުގައި ރާއްޖޭގެ ކެޕްޓަން، މުހައްމަދު އިލާން އިމްރާންއެވެ.

މި ގްރޫޕްގައި ދެން ހިމެނެނީ އިންޑިއާއެވެ. އިންޑިއާއާއި ބަނގުލަދޭޝް ބައްދަލުކުރި މެޗު 1-0 އިން އިންޑިއާ ކާމިޔާބުކޮށްފައިވުމުން، ސެމީ ފައިނަލުން ޖާގަ ހޯދުމަށް ރާއްޖޭގެ ޓީމުން އެންމެ މަދުވެގެން އިންޑިއާއާ ދެކޮޅަށް ކުޅޭ މެޗުގައި ޕޮއިންޓެއް ހޯދަން ޖެހޭނެއެވެ.

މި ވަގުތު ގްރޫޕްގެ އެއް ވަނައިގައި އޮތީ ތިން ޕޮއިންޓާއެކު އިންޑިއާއެވެ. އަދި ދެ ވަނައިގައި އޮތް ރާއްޖެ އާއި ތިން ވަނައިގައި އޮތް ބަންގްލަދޭޝަށް ވަނީ ޕޮއިންޓެއް ލިބިފައެވެ.

ރާއްޖެ އާއި އިންޑިއާ ކުޅޭ ގްރޫޕްގެ ފަހު މެޗު އޮންނާނީ އަންގާރަ ދުވަހެވެ.