ހެލްތު މިނިސްޓްރީގެ ހުއްދަ ނުހޯދައި، ހިޖާމާ ޖެހުމުގެ ޚިދުމަތްދޭ ކްލިނިކެއްގެ މައްސަލަ އެމިނިސްޓްރީން ހުށައަޅާފައިވާތީ، އެ ކަން ތަޙްޤީޤު ކުރަމުންދާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، ހެލްތު މިނިސްޓްރީން އެ އިދާރާއަށް ހުށައަޅާފައި ވަނީ، ހުއްދަ ނުނަގައި ހުޅުމާލޭގައި ހިންގަމުން އަންނަ ކްލިނިކެއްގެ މައްސަލަ ކަމަށެވެ. އެއީ ކޮން ކްލިނިކެއްކަން ފުލުހުން ހާމަކޮށްފައި ނުވި ނަމަވެސް އެކްލިނިކަކީ، ފަޒީސް ހިޖާމާ ތެރަޕީގެ ނަމުގައި ހިންގަމުުން އަންނަ ކްލިނިކްކަން އެނގިފައިވެއެވެ.

2016 ވަނަ އަހަރުން ފެށިގެން ހިންގަމުން އަންނަ އެކްލިނިކް ބަންދު ކުރުމަށް މީގެ ކުރިންވެސް ހެލްތު މިނިސްޓްރީން މަސައްކަތްކޮށްފައިވެއެވެ. މިފަހަރުވެސް އެތަން ބަންދުކުރުމަށް ހެލްތު މިނިސްޓްރީން އެންގުމުން އެ މިނިސްޓްރީގެ އެންގުމަށް ތަބާ ނުވެ ފަޒީ އަންނަނީ ކްލިނިކް ހިންގަމުންނެވެ.

ފުލުހުންގެ އިދާރާގައި ހެލްތު މިނިސްްޓްރީ އެ ކްލިނިކް ބަންދުކޮށްދިނުމަށް އެދިފައި ވަނީ އެތަން ހިންގާ ފަރާތްތަކުން ހެލްތު މިނިސްޓްރީގެ އެންގުމަށް ތަބާވެފައި ނުވާތީއެވެ.