ހިޒްބުﷲގެ ހަނގުރާމަވެރިން ބޭނުން ކުރަމުން އައި މުވާޞަލާތީ ޕޭޖަރުތައް ގޮވައި ގިނަ އަދަދެއްގެ ހަނގުރާމަވެރިން ޒަޚަމްވެ ބައެއް ހަނގުރާމަވެރިން މަރުވި ހާދިސާއަކީ އިޒްރޭލުން ދިން ހަމަލާއެއް ކަމުގައި ބައިނަލްއަޤުވާމީ މީޑިއާތަކުން ރިޕޯޓްކޮށްފިއެވެ.

އިއްޔެ ބެއިރޫތުގައި ހިނގި ޕޭޖަރުތަކުގެ ބެޓެރީ ގޮވުމުގެ ހާދިސާތަކުގައި 3000 ވުރެ ގިނަ ހިޒުބުﷲގެ ހަނގުރާމަވެރިން ޒަޚަމްވެ 9 މީހުން މަރުވެފައިވާ ކަމަށް ރިޕޯޓްތައް ބުނެއެވެ.

ގޮއްވާލި ޕޭޖަރ ތަކަކީ، ހިޒްބުﷲއިން ވަރަށް ފަހުން ގަނެގެން ގެނައި ޕޭޖަރ ތަކެކެވެ. މިޕޭޖަރތައް ގަނެފައި ވަނީ، ތައިވާނުގެ ކުންފުންޏެއް ކަމަށްވާ، ގޯލްޑް އެޕޯލޯއިންނެވެ. އެކުންފުނިން އުފެއްދި ޕޭޖަރުތައް ހަމަލާދިނުމުގެ ހަތިޔާރެއްގެ ގޮތުގައި އިޒްރޭލުން ބޭނުންކޮށްފައި ވަނީ ޔޫރަޕްގެ ކުންފުންޏަކާއި ގުޅިގެން ކަމަށްވެސް ރިޕޯޓްތައް ބުނެއެވެ.

ނިއު ޔޯކް ޓައިމްސް އިން އަންގާރަ ދުވަހު ރިޕޯޓްކޮށްފައިވާ ގޮތުގައި އިޒްރޭލުން ވަނީ ގޯލްޑް އެޕޯލޯ އިން އޯޑަރުކޮށްގެން ހިޒްބުالله ޖަމާއަތުން ގެންދިޔަ ޕޭޖަރުތަކުގެ ބެޓެރީގެ ތެރޭގައި ގޮވާތަކެތި ފޮރުވާފައެވެ. އަދި އެޕޭޖަރުތައް ފަރުމާކޮށްފައި ހުރީ، ރިމޯޓް ކޮންޓްރޯލް ބޭނުންކޮށްގެން އެއްފަހަރާ ގޮއްވައިލެވޭ ގޮތަށެވެ.

ލުބުނާނުގެ އެކި ކަންކޮޅުތަކުގައި އެތައް ހާސް ބަޔަކު ޒަޚަމްކޮށްލި މި ހަމަލާއަކީ، އިސްރާއީލުގެ ޖާސޫސީ އިދާރާ، މޮސާޑާއި އިސްރާއީލުގެ ހައްދު ފަހަނައެޅި އަސްކަރިއްޔާ ގުޅިގެން ހިންގި އަމަލެއް ކަމުގައިވެސް ބައިނަލްއަޤުވާމީ މީޑިއާތަކުގައި ވަނީ ރިޕޯޓްކޮށްފައެވެ.

ހިޒްބުﷲ ހަނގުރާމަވެރިން މޯބަލް ފޯނުގެ ބަދަލުގައި، ޕޭޖަރ ބޭނުން ކުރަން ފަށާފައި ވަނީ، ދުނިޔޭގެ މުވާޞަލާތީ ވަސީލަތްތަކުގައި ޔަހޫދީންގެ ކޮންޓްރޯލް އޮތުމާއި އެކު އެކަމުގެ ސަބަބުން ކުރިމަތިވެދާނެ ނުރައްކާތަކަށް ބަލާފައެވެ.

ލުބުނާނުގައި އިއްޔެ ދިން ހަމަލާއާއި ގުޅިގެން، ޒަމާނީ ވަޞީލަތްތައް ހަނގުރާމައިގެ ހަތިޔާރުގެ ގޮތުގައި ބޭނުންކޮށް، ވަކިވަކި މީހުންނާއި ގުރޫޕްތަކަށް ހަމަލާދިނުމުގެ ޒަމާނެއް ފެށިގެން ދިޔައީ ކަމުގެ ކަންބޮޑުވުން އާއްމުފަރާތްތަކުން ވަނީ ސޯޝަލްމީޑިއާގައި ފާޅުކޮށްފައެވެ.

ލުބުނާނުގެ ބެއިރޫތު ބަނދަރުގައި 2020  ވަނަ އަހަރުގެ އޮގަސްޓް މަހުގެ 4 ވަނަ ދުވަހު ގޮވި ބާރުގަދަ ގޮވުމަކީވެސް އިޒްރޭލުގެ ހަމަލާއެއް ކަމުގައި ލުބުނާނުން ތުހުމަތުކޮށްފައިވެއެވެ. ނިއުކުލިއަ ގޮވުމެއްހައި ބާރުގަދަ އެގޮވުމުގެ ސަބަބުން ލުބުނާނުގައި 218 މީހުން މަރުވެ 7000 ވުރެ ގިނަ މީހުން ޒަޚަމްވެ ތިން ލައްކައަށްވުރެ ގިނަ މީހުންގެ ގެދޮރު ގެއްލި، 15 ބިލިއަން ޑޮލަރުގެ ޢުމުރާނީ ގެއްލުންތައް ލިބުނެވެ.