ރޭ މާލޭގެ ގެެއެއްގެ ތެރޭގައި މަރުވެފައި އޮއްވައި ފެނުނު މީހާގެ މަރާއި މެދު ޝައްކު އުފެދޭ ބާވަތުގެ ކަމެއް ފެންނަން ނެތްކަމުގައި ފުލުހުންގެ އިދާރާއިން ހާމަކުރައްވައިފިއެވެ.

ފުލުހުންގެ އިދާރާއިން ވިދާޅުވީ، ރޭ މާލޭގެ ގެއެއްގެ ކޮޓަރީގައި ނިޔާވެފައި އޮއްވައި ފެނިފައި ވަނީ، މ. ނަލަހިޔާ މަންޒިލް، އަޙްމަދު ފަޔާޒް (57އ) ކަަމަށެވެ.

ފުލުހުންގެ އިދާރާއިން ހާމަކުރައްވާފައިވާ ގޮތުގައި، އޭނާ ނިޔާވެފައި އޮއްވައި ފެނުނީ، މ. ނަލަހިޔާ މަންޒިލްގެ 3 ވަނަ ފަންގިފިލާގެ ކޮޓަރިއެއްގެ ތެރެއިންނެވެ. ފުލުހުންނަށް އެކަން ރިޕޯޓްކޮށްފައި ވަނީ ރޭގެ 23:33 ހާއިރުގައި ކަމުގައިވެސް ފުލުހުން ވިދާޅުވިއެވެ.

އަޙްމަދު ފަޔާޒް މަރުގެ މައްސަލަ އާއި ގުޅިގެން ފުލުހުން މީޑިއާތަކަށް ފޮނުވި މެސެޖުގައި ވިދާޅުވެފައި ވަނީ، އޭނާގެ ހަށިގަނޑުގެ ބޭރުފުށުން އެއްވެސް އަނިޔާއެއް ލިބިފައިވާ ކަމުގެ ނިޝާނެއް ނެތްކަމަށާއި އަދި އޭނާގެ މަރާއި މެދު ތުހުމަތެއް އުފެދޭ ކަމެއް މިހާތަނަށް ފާހަގަވެފައި ނެތް ކަމަށެވެ.