ކުނި މެނޭޖް ކުރުމުގެ ޤާނޫނަށް ސަރުކާރުން ހުށައަޅާފައިވާ އިސްލާޙް ފާސްނުކޮށް ރައްޔިތުންގެ މަޖިލިސް ދައުރު ނިންމާލައި ޗުއްޓީއަށް ހިނގައްޖެއެވެ.

ޤާނޫނު ނަންބަރު 2022/24 (ކުނި މެނޭޖު ކުރުމުގެ ޤާނޫނު) އަށް އިސްލާޙް ގެނައުމުގެ ބިލު ސަރުކާރުން ރައްޔިތުންގެ މަޖިލީހަށް ހުށައެޅީ ހުސްވި މާރިޗު މަހުގައެވެ. އެބިލް ހުށައެޅުމުގެ އެއްބޭނުމަކީ، އެޤާނޫނު މިހާރު އޮތް ގޮތުގެ ސަބަބުން، ކޮތަޅުން ފީނަގާއިރު، ތަކުރާރުކޮށް ފީ ނެގޭ ގޮތަށް އޮތުމުން ރައްޔިތުންނަށް އުފުލަންޖެހޭ ތަކުލީފާއި އިޤުތިޞާދަށް އަންނަ ލޮޅުން ކުޑަކުރުމެވެ.

އެންވަޔަރަމަންޓް މިނިސްޓަރ އާމިނަތު ޝިއުނާވެސް ރައްޔިތުންގެ މަޖިލީހުގައި ފާހަގަކުރައްވާފައިވާ ގޮތުގައި، މައްސަލަ ދިމާވީ، ޤާނޫނު ނަންބަރު 2022/24 (ކުނި މެނޭޖު ކުރުމުގެ ޤާނޫނު) ފާސްކުރި އިރު، ސަރުކާރުން ހުށައަޅާފައިވާ ގޮތަށް ކޮމިޓީ މަރުހަލާގައި ގެނައި ބަދަލުތަކުގެ ސަބަބުންނެވެ. މިގޮތުން އެޤާނޫނުގައި ހިމަނާފައިވާ އިސްތިސްނާ ހާލަތްތައް ކޮމިޓީ މަރުހަލާގައި އުނިކޮށް ބިލް ފާސްކުރުމަކީ މިހާރު އުފެދިފައިވާ މައްސަލައިގެ އަސްލެވެ.

މިހާރު ސަރުކާރުގެ ފަރާތުން ރައްޔިތުންގެ މަޖިލީހަށް ހުށައަޅާފައިވާ، ޤާނޫނު ނަންބަރު 2022/24 (ކުނި މެނޭޖު ކުރުމުގެ ޤާނޫނު) އަށް އިސްލާޙް ގެނައުމުގެ ބިލު، ސަރުކާރުން މަޖިލީހަށް ހުށައެޅީވެސް ޤާނޫނުގައި ޕްލާސްޓިކް ކޮތަޅުން ފީނެގުމަށް ކަނޑައަޅާފައިވާ މުއްދަތުގައި އެކަން ފެށޭއިރު ދިމާވާ މައްސަލަތައް ހައްލު ކުރުމުގެ ގޮތުން ކަމުގައި ރައްޔިތުންގެ މަޖިލީހުގެ އެމްޑީޕީގެ މެމްބަރުން ވިދާޅުވިއެވެ. މިބިލްގެ ފުރަތަމަ ކިޔުން އިއްވާފައި ވަނީ، 29 މާރިޗު 2023ގައި އޮތް ރައްޔިތުންގެ މަޖިލީހުގެ 2023 ވަނަ އަހަރުގެ ފުރަތަމަ ދައުރުގެ 24 ވަނަ ޖަލްސާގައެވެ. އަދި މިބިލްގެ އިބްތިދާއީ ބަހުސް ފަށާފައި ވަނީ، 24 އޭޕްރީލް 2023 ވަނަ ދުވަހު އޮތް ރައްޔިތުންގެ މަޖިލީހުގެ 2023 ވަނަ އަހަރުގެ ފުރަތަމަ ދައުރުގެ 24 ވަނަ ޖަލްސާގައެވެ.

މިބިލް އަވަހަށް ފާސްކޮށް މިހާރަށް އުފެދިފައިވާ މައްސަލަ ހައްލު ކުރުމުގެ ބަދަލުގައި މަޖިލީހުގެ ރިޔާސަތުން މިބިލް ފާސްކުރުން ލަސްކުރުމުގެ ނިޔަތެއް އޮތް ކަމުގައި ރައްޔިތުންގެ މަޖިލީހުގެ ބައެއް މެމްބަރުން ތުހުމަތު ކުރައްވައެވެ. އެގޮތުން ރައްޔިތުންގެ މަޖިލީހުގެ ޖަލްސާތަކުގެ އެޖެންޑާ ތަރުތީބު ކަނޑައަޅަނީ މަޖިލީހުގެ ރިޔާސަތުން، ރައީސް ނަޝީދު ކަމުގައި ވާއިރު، ރައްޔިތުންގެ މަޖިލީހުގެ އެންމެ ފަހުން ބޭއްވި ކޮންމެ ޖަލްސާއެއްގައިވެސް މި ބިލް ހިމަނާފައި ވަނީ އެޖެންޑާގެ އެންމެ ފަހަތުގައެވެ. އަދި މިއަދު އެ ބިލަށް ވޯޓަށް ނޭހީ، ރައްޔިތުންގެ މަޖިލީހުގެ މެމްބަރުން އެބިލަށް އިތުރަށް ބަހުސްކުރަން އެދިވަޑައިގަންނަވާ ކަމަށް ވިދާޅުވެ ރައީސް ނަޝީދެވެ.

އެހެންކަމުން ރައީސް ނަޝީދުގެ މަޤުޞަދަކީ މަޖިލީހުގެ ތެރެއިން ސަރުކާރަށް އިތުރަށް ޖެއްސުން ކުރެއްވުން ކަމުގައި ރައްޔިތުންގެ މަޖިލީހުގެ ބައެއް މެމްބަރުން ސިފަކުރައްވައެވެ.

ރައްޔިތުންގެ މަޖިލީހުގެ މިއަހަރުގެ ދެވަނަ ދައުރު ފެށޭނީ އަންނަ މެއި މަހުގެ 3 ވަނަ ހަފްތާގައެވެ.