ސަރުކާރުގެ ފަރާތުން، ރައްޔިތުންގެ މަޖިލީހުގެ ފޭދޫ އުތުރު ދާއިރާގެ މެންބަރު އިސްމާޢީލް ނިޒާމް ރައްޔިތުންގެ މަޖިލީހަށް ހުށައެޅުއްވި، ޤާނޫނު ނަންބަރު 7/2023 (ކުންފުނީގެ ޤާނޫނު) އަށް އިޞްލާޙު ގެނައުމުގެ ބިލު, ސަރުކާރުން ރައްޔިތުންގެ މަޖިލީހަށް ހުށައެޅި ގޮތަށް އެއްވެސް ބަދަލެއް ނުގެނެސް މެމްބަރުންގެ އިއްތިފާޤުން ފާސްކޮށްފިއެވެ.

މިބިލް ފާސްކުރުމަށް މިއަދު ގެ ޖަލްސާގައި ވޯޓަށް އެހުމުން، ވޯޓުގައި ބައިވެރިވެވަޑައިގެންނެވި 85 މެމްބަރުންވެސް ވޯޓު ދެއްވީ، ސަރުކާރުން ހުށައެޅި ގޮތަށް ބިލް ފާސްކުރަން ފެންނަ ކަމަށެވެ. 

މިބިލް މަޖިލީހަށް ބަލައިގަތީ އިއްޔެއެވެ. ކޮމިޓީއަށް ބިލް ފޮނުވިތާ ދެތިން ގަޑިއިރުގެ ތެރޭގައި ކޮމިޓީންވެސް ބިލް ފާސްކުރި އިރު، މިބިލް ދިރާސާކުރުމަށް ބޭއްވި އިޤުތިޞާދީ ކޮމިޓީގެ ބައްދަލުވުމުގައި ބިލް ފާސްކުރުމަށް ހޭދަވީ 10 މިނިޓެވެ. 

މިބިލުން ކުންފުނީގެ ޤާނޫނަށް ސަރުކާރުން ގެންނަން ބޭނުންވި އެންމެ މުހިއްމު ބަދަލަކީ، ކުންފުނީގެ ހިންގާ ޤަވާއިދުން ކުންފުނީގެ ބޯޑަށް މެމްބަރުން ޢައްޔަނުކުރެވޭނެ ޢަދަދުތައް ކަނޑައެޅުމާއި، ކުންފުނީގެ އަހަރީ އާއްމު ޖަލްސާ އާއި ޚާއްޞަގޮތުން ބާއްވާ އާއްމު ޖަލްސާތަކުގެ ނޯޓިސްގެ މުއްދަތު ކުރު ކުރުމެވެ.