ޔޫރަޕްގެ ކުލަބްތަކުގެ މެދުގައި ކުޅޭ އެންމެ ޝަރަފުވެރި މުބާރާތް ކަމުގައިވާ، ޗެމްޕިއަންސް ލީގު ކުޅޭ ފޯމެޓަށް ގެނައި ބަދަލާއެކު މިރޭ ގްރޫޕް ފޭސްގެ މެޗުތައް ފަށަން ހަމަޖެހިފައިވާއިރު، އެންމެ ގިނަ ބަޔަކު ސަމާލުކަން ހުއްޓޭނެ އެއް މެޗަކީ ލިވަޕޫލާއި އޭސީ މިލާން ބައްދަލު ކުރާ މެޗެވެ.

މިލާންގެ ސެން ސީރޯގައި ކުޅުމަށް ހަމަޖެހިފައިވާ މި މެޗު ފަށާނީ ރާއްޖެ ގަޑިން މެންދަމު 12 ޖަހާއިރެވެ. މި ދެ ޓީމު އެންމެ ފަހުން ކޮމްޕެޓެޓިވް މެޗެއް ކުޅެފައިވަނީ ޗެމްޕިއަންސް ލީގުގެ 2021/22 ސީޒަންގައެވެ. އެ މުބާރާތުގައި ދެ ޓީމު އެއް ގްރޫޕެއްގައި ހިމެނުނުއިރު، ލިވަޕޫލުން ވަނީ ހޯމް މެޗާއި އަވޭ މެޗު ވެސް ކާމިޔާބުކޮށްފައެވެ.

މި މުބާރާތުގެ ދެ މެޗު މިރޭ އިރާކޮޅު ވެސް ކުޅޭނެއެވެ. އެގޮތުން ރާއްޖެ ގަޑިން 9:45 ގައި ދެ މެޗު ފެށުމަށް ހަމަޖެހިފައިވާ އިރު، އެއް މެޗުގައި ކުޅޭނީ އިޓަލީގެ ޔުވެންޓަސް އާއި ނެދަލޭންޑްސްގެ ޕީއެސްވީ އެއިންދޮވޭންއެވެ. އަނެއް މެޗުގައި ބައްދަލު ކުރާނީ ސްވިޒަލޭންޑުގެ ޔަންގް ބޯއީޒް އާއި އިންގްލެންޑުގެ އެސްޓަން ވިލާއެވެ.

މީގެ އިތުރުން، ޖަރުމަނުގެ ބެޔާން މިއުނިކާއި ކޮރޭޝިއާގެ ޑައިނަމޯ ޒަގްރެބް ބައްދަލުކުރާ މެޗާއި އަދި ސްޕެއިންގެ ރެއާލް މެޑްރިޑާއި ޖަރުމަނުގެ ސްޓުޑްގާޓް ބައްދަލުކުރާ މެޗު ވެސް މިރޭ އޮންނާނެއެވެ. މި ދެ މެޗު ވެސް ފަށާނީ ރާއްޖެ ގަޑިން މެންދަމު 12 ޖަހާއިރެވެ.