ސަރުކާރުގެ ފަރާތުން، ރައްޔިތުންގެ މަޖިލީހުގެ ފޭދޫ އުތުރު ދާއިރާގެ މެންބަރު އިސްމާޢީލް ނިޒާމް ރައްޔިތުންގެ މަޖިލީހަށް ހުށައެޅުއްވި، ޤާނޫނު ނަންބަރު 7/2023 (ކުންފުނީގެ ޤާނޫނު) އަށް އިޞްލާޙު ގެނައުމުގެ ބިލު ދިރާސާކުރާ ކޮމިޓީން 10 މިނިޓް ތެރޭގައި އެބިލް ފާސްކޮށްފިއެވެ،

ބިލް ފާސްކުރީ ސަރުކާރުން ހުށައަޅާފައިވާ ގޮތަށް އެއްވެސް ބަދަލެއް ނުގެނެހެއެވެ. ބިލް މަޖިލީހަށް ބަލައި ގަނެ އިބްތިދާއީ ބަހުސް ނިންމައި ކޮމިޓީއަށް ފޮނުވުމަށް ފާސްކުރީ، ދައުރުން ބޭރުން މިއަދު ހެނދުނު ބޭއްވި ރައްޔިތުންގެ މަޖިލީހުގެ ޖަލްސާގައެވެ. މިދިޔަ ބުދަ ދުވަހު ސަރުކާރުން މަޖިލީހަށް ހުށައެޅި މި ބިލް މަޖިލީހަށް މިއަދު ބަލައިގަތީ 77 މެމްބަރުންގެ ވޯޓުންނެވެ. 

މި ބިލް އެއްވެސް ބަދަލެއް ނުގެނެސް ފާސްކުރުމަށް ކޮމިޓީން ނިންމީ އެބިލް ދިރާސާކުރުމަށް މަޖިލީހުގެ އިޤުތިޞާދީ ކޮމިޓީން ބޭއްވި ފުރަތަމަ ބައްދަލުވުމުގައި އެކޮމިޓީގެ ބައްދަލުވުން ފެށިތާ 10 މިނިޓްގެ ތެރޭގައެވެ. ކޮމިޓީ ބައްދަލުވުމުގައި ބައިވެރިވެވަޑައިގެންނެވި 8 މެމްބަރުންވެސް ނިންމެވީ ސަރުކާރުން ހުށައަޅުއްވާފައިވާ ގޮތަށް އެއްވެސް ބަދަލެއް ނުގެނެސް އެބިލް ފާސްކުރެއްވުމަށެވެ.

މިބިލުން ކުންފުނީގެ ޤާނޫނަށް ސަރުކާރުން ގެންނަން ބޭނުންވި އެންމެ މުހިއްމު ބަދަލަކީ، ކުންފުނީގެ ހިންގާ ޤަވާއިދުން ކުންފުނީގެ ބޯޑަށް މެމްބަރުން ޢައްޔަނުކުރެވޭނެ ޢަދަދުތައް ކަނޑައެޅުމާއި، ކުންފުނީގެ އަހަރީ އާއްމު ޖަލްސާ އާއި ޚާއްޞަގޮތުން ބާއްވާ އާއްމު ޖަލްސާތަކުގެ ނޯޓިސްގެ މުއްދަތު ކުރު ކުރުމެވެ.