ޕްރޮސެކިއުޓާ ޖެނެރަލް (ޕީޖީ) ގެ މަގާމަށް ކުރިމަތިލެއްވީ އެކަމަށް ވަކި ބޭފުޅަކު ނުވަަތަ ބަޔަކު އެދިވަޑައިގެން ނޫންކަމަށާއި އެއީ އަމިއްލަފުޅު ނިންމެވުމަށްކަމުގައި،  ޕީޖީގެ މަޤާމަށް ޢައްޔަނުކުރެއްވުމަށްޓަަކައި، ރައީސް ރައްޔިތުންގެ މަޖިލީހަށް ނަންފުޅު ފޮނުވާފައިވާ، އަލްއުސްތާޛު އައްބާސް ޝަރީފް ވިދާޅުވެއްޖެއެވެ.

ޢައްބާސް ޝަރީފް މިހެން ވިދާޅުވީ، ރައްޔިތުންގެ މަޖިލީހުގެ ޖުޑީޝަރީ ކޮމިޓީގެ ބައްދަލުވުމަށް ހާޟިރުވެވަޑައިގެން މެމްބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ. ޕްރޮސެކިއުޓާ ޖެނެރަލް (ޕީޖީ) ގެ މަގާމަށް ހ. ޔެލޯރޯޒް، އައްބާސް ޝަރީފް ޢައްޔަނުކުރެއްވުމަށްޓަކައި، އޭނާގެ ނަންފުޅު ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހުގެ ރުހުން ހޯއްދެވުމަށް އެ މަޖިލީހަށް ފޮނުއްވީ، މި ސެޕްޓެމްބަރު މަހުގެ 11 ވަނަ ދުވަހުގައެވެ. ޢައްބާސް މި ވަގުތު ހުންނެވީ، ރައިސުލްޖުމްހޫރިއްޔާގެ އޮފީހުގެ ސެކްރެޓެރީ ޓު ދަ ޕްރެޒިޑެންޓް އޮން ލީގަލް އެފެއާޒްގެ މަޤާމުގައި ކަމަށްވުމާއި އެކު އޭނާ އެމަޤާމަށް ކުރިމަތިލެއްވީ، ރައީސުލްޖުމްހޫރިއްުޔާ އެދިވަޑައިގެން ކަމަށް ބައެއް ފަރާތްތަކުން ވަނީ ސޯޝަލްމީޑިއާގައި ވާހަކަތައް ފަތުރާފައެވެ. 

ޢައްބާސް ވިދާޅުވީ، އޭނާ ޕީޖީގެ މަޤާމަށް ކުރިމަތިލެއްވީ، ޤައުމަށް ޚިދުމަތެއް ކުރެއްވުމުގެ ނިޔަތުގައި ކަމަށާއި، ވަކި ބޭފުޅަކު ނުވަތަ ބަޔަކު އެކަމަށް އެދިވަޑައިގެން ނޫންކަމަށެވެ. ޢައްބާސް ވިދާޅުވީ، އޭނާ ޕީޖީގެ މަޤާމަށް ކުރިމަތި ލެއްވުމަށްޓަކައި، ކުށުގެ ރެކޯޑް ފުރިހަމަ ކުރައްވަން ހުށައެޅުއްވި އިރުވެސް އޭނާއާއެކު މަސައްކަތް ކުރައްވާ ބޭފުޅުންނަށްވެސް އެކަން އެނގިވަޑައި ނުގަންނަވާނެ ކަމަށެވެ. އަދި އެބޭފުޅުންނަށްވެސް އެކަން އެނގިވަޑައިގެންނެވީ މީޑިއާގެ ޒަރީޢާއިން ކަމަށެވެ. ބައެއް ބޭފުޅުން އެމަނިކުފާނަށް މަރުޚަބާ ވިދާޅުވާން ފެއްޓެވީ އެހިސާބުން ކަމުގައިވެސް ޢައްބާސް ވިދާޅުވިއެވެ.

ޢައްބާސް ވިދާޅުވީ، ޕީޖީގެ މަޤާމަށް އޭނާ ޢައްޔަނު ކުރައްވައިފިނަމަ، މަސައްކަތްޕުޅު ކުރައްވާނީ، އެއްވެސް ނުފޫޒަކަށް ބެއްލެވުމެއް ނެތި ކަމަށާއި، އަދި އަމާޒަކީވެސް 5 އަހަރުގެ ދައުރު ފުރިހަމަ ކުރައްވައި، ރަނގަޅު ބަދަލުތަކެއް ގެނައުން ކަމަށެވެ.