މަތީ ސާނަވީ ނިމޭ އިރު ކުރިއަށް ދާންވީ ދާއިރާ ޙިޔާރު ނުކުރެވޭ އެތައް ދަރިވަރުންނެއް ރާއްޖޭގައި އެބަ ތިއްބެވެ. ގިނަ ކުދިން ބޮޑު ވަނީ މުސްތަޤްބަލަށް މާ ބޮޑު އުންމީދުތަކެއް ނުކޮށެވެ. އެއީ ބޮޑުވަމުން އަންނަ މާޙައުލުން އެކަމުގެ މުހިންމުކަން އެ ކުދިންނަށް ވިސްނާ ނުދެވޭތީއެވެ. އުމުރުން 20 އަހަރުން މައްޗަށް ގޮސް، ނަމަވެސް ކުރިއަށް ދާންވީ ދާއިރާ ނޭގިފައި ތިބި ޒުވާނުން ބައިވަރު އެބަ ތިއްބެވެ. އެހެންނަމަވެސް އެއީ ފުރުޞަތު ނެތިގެނެއް ނޫނެވެ. ދިވެހިރާއްޖޭގައި މަތީ ތަޢުލީމު ހާސިލު ކުރެވޭނެ ބައިވަރު ގޮތްތައް ފަހިވެފައި އެބަ އޮތެވެ.

ދިވެހިރާއްޖޭގެ ޤައުމީ ޔުނިވާސިޓީ މިއީ ޖީބަށް އެންމެ ލުއި އަދި އެންމެ ގިނަ މަތީ ތަޢުލީމުގެ ރޮނގުތަކުން ތަޢުލީމު ހާސިލު ކުރެވޭނެ ފުރުޞަތު އޮތް ޔުނިވާސިޓީއޭ ބުނުމަކީ ދޮގަކަށް ނުވާނެއެވެ. މި ހިނގާ އޯގަސްޓް މަހުގެ 13 ވަނަ ދުވަހު 2023 ވަނަ އަހަރުގެ ދެވަނަ ސެމިސްޓާރ ފަށަން ވަނީ ހަމަޖެހިފައެވެ. މި ކޯސްތަކަށް ކުރިމަތި ލުމުގެ ފުރުޞަތު 25 ޖުލައި 2023 ވަނީ ބަންދުކޮށްލެވިފައެވެ.

ޖުމްލަ 96 ކޯހެއް ހިމެނޭހެން މި އަހަރުގެ މޭ މަހު ހުޅުވާލެވުނު ކޯސްތަކުން މި އަހަރު ކުރިއަށް ގެންދިއުމަށް ކަނޑައެޅިފައިވާ ކޯސްތަކުގެ ލިސްޓެއް އިއްޔެ އެމް.އެން.ޔޫގެ ވެބްސައިޓުގައި ވަނީ އާންމުކޮށްފައެވެ. އޭގެ ތެރޭގައި 44 ކޯހެއް އެމް.އެން.ޔޫގެ ރަށްރަށުގެ ފެކަލްޓީތައް ހިމެނޭހެން ކުރިއަށް ގެންދިއުމަށް ވަނީ ނިންމާފައެވެ. އަދި 70އަށް ވުރެ ގިނަ ކޯސް ކުދިން ހަމަނުވުމުގެ ސަބަބުން ކުރިއަށް ގެންދިއުމާމެދު ވަކި ގޮތެއް ނުނިންމިވެއެވެ.

ބެޗެލާޒް އޮފް ސޯޝަލް ވޯކް

ސޯޝަލް ވޯކަރުންނަކީ ދުޅަހެޔޮ މުޖުތަމައެއް ބިނާކުރުމުގައި ވަރަށް މުހިންމު ބައެއް އަދާކުރާ ބައެކެވެ. އެގޮތުން ކުޑަކުދިންނާއި، ނުކުޅެދޭ ފަރާތްތަކާއި، ނިކަމެތިންނާއި، އެޑިކްޝަންގެ ވަބާގައި ޖެހިފައި ތިބި ފަރާތްތަކާއި، ގެވެށި އަނިޔާގެ ޝިކާރައަކަށް ވެފައިވާ ފަރާތްތައް އަދި މީގެ އިތުރުން އާއިލީ މައްސަލަތަކުގައި ވެސް ސޯޝަލް ވޯކަރުންގެ ދައުރު ވަރަށް ބޮޑެވެ. މި ފަރާތްތަކުގެ ޙައްޤު އެންމެ ފުރިހަމަގޮތުގައި ލިބިދޭތޯ ކަށަވަރުކުރުމަކީ ސޯޝަލް ވޯކަރުންގެ އެންމެ ބޮޑު އެއް ޒިންމާއެވެ. އެހެންކަމުން ދިވެހިރާއްޖެއަށް މިއަދު ސޯޝަލް ވޯކަރުންގެ ބޭނުން ވަރަށް ބޮޑެވެ.

ޑިޕްލޮމާ އިން މިޑްވައިފަރީ

މިއީ ސިއްޙީ ދާއިރާގައި މުހިންމު ބައެއް އަދާކުރާ ބައެކެވެ. ޙާއްޞަގޮތެއްގައި މާބަނޑު މީހުންނާއި ވިހައިގެން އުޅޭ މީހުންގެ މެދުގައި ފޯރުކޮށްދެވޭ ސިއްޙީ އެހީތަކަށެވެ.