މިސެޕްޓެމްބަރު މަހުގެ 9 ވަނަ ދުވަހު، ހެންވޭރު ދޫހިމެރިގޭގައި ހިނގި އަލިފާނުގެ ހާދިސާ އާއި ގުޅިގެން އެގެ ތަޅާލައި ބިން ސާފުކޮށް ނިންމައިފިއެވެ.

މިނިސްޓްރީ އޮފް ސިޓީސް، ލޯކަލްގަވަރމެންޓް އެންޑް ޕަބްލިކް ވޯކްސްއިން ވިދާޅުވީ، އެގެ ތަޅާަލައި ބިން ސާފުކުރުމުގެ މަސައްކަތް ނިންމައި މަގު ބަންދުކޮށްފައި އޮތް ސަރަހައްދު އިއްޔެ އާއްމު ޓްރެފިކަށް ހުޅުވާލާފައި ވާކަމަށެވެ. އެގެ ތަޅާލައި ބިން ސާފުކުރުމުގެ އަމަލީ މަސައްކަތްކޮށްފައި ވަނީ، އެމިނިސްޓްރީގެ ބިދޭސީ މުވައްޒަފުންނެވެ.

ސެޕްޓެމްބަރު މަހުގެ 9 ވަނަ ދުވަހު، 14:48 ހާއިރުގައި، ހ. ދޫހިމެރިގޭގައި ހިންގަމުން އައި ގާމަގު ކެފޭގެ ބަދިގޭގައި ރޯވެ ހިނގި އަލިފާނުގެ ހާދިސާ އާއި ގުޅިގެން އެގެއަށް ބޮޑެތި ގެއްލުންތަކެއް ލިބުނެވެ. މިގޮތުން ޑެކްއަޅައިގެން ތިންބުރިއަށް ހަދާފައި ހުރި އެގޭގެ ހުރިހާ ފަންގިފިލާއެއް އަނދައިގެން ދިޔައެވެ.

އެގޭގައި ހިނގި އަލިފާނުގެ ހާދިސާ އާއި ގުޅިގެން 57 މީހަކަށް އެހީތެރިކަން ފޯރުކޮށްދެވިފައި ވާކަމުގައި ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީން ވަނީ ވިދާޅުވެފައެވެ.