އިންޑިއާގެ ޗެންނާއިގައި ކުރިއަށްދާ ހަތަރު ވަނަ ސައުތު އޭޝިއަން ޖޫނިއާރ އެތުލެޓިކްސް ޗެމްޕިއަންޝިޕްގެ، 4 ގުނަ 100 މީޓަރުގެ ރިލޭ އިވެންޓުން ރާއްޖޭގެ އަންހެން އަދި ފިރިހެން ޓީމުން ބްރޯންޒް މެޑަލް ހޯދައިފިއެވެ.

ހަތަރެއް ގުނަ ސަތޭކަ މީޓަރު އިވެންޓުގައި ރާއްޖެ ތަމްސީލުކޮށްފައި ވަނީ މުހައްމަދު މިންހާލް ޝާމިން (މިންކޮ)، އިބްރާހިމް ނާހިލް ނިޒާރު، ޒުއިޒް މުހައްމަދު ސުއާދު އަދި ހުސެއިން ޒީކް ސުއާދުއެވެ. މި އެތުލީޓެން ރާއްޖެއަށް ބްރޯންޒް މެޑަލް ހޯދައިދިނީ 41.98  ސިކުން ރޭސް ނިންމައިގެންނެވެ.

މި އިވެންޓުގެ އެއްވަނަ 40.28 ސުކުންތުން ސްރީ ލަންކާ ހޯދިއިރު، ދެވަނަ އަށް ދިޔަ އިންޑިއާ އަށް ރޭސް ނިންމުނީ 40.76 ސިކުންތުންނެވެ.

ހަތަރެއް ގުނަ ސަތޭކަ މީޓަރުގެ އަންހެން އިވެންޓުން ލޯ މެޑަލް ހޯދާފައުވަނީ 48.04 ސިކުންތުން ރޭސް ނިންމައިގެންނެވެ. މި އިވެންޓުގައި ރާއްޖެ ތަމްސީލުކޮށްފައިވަނީ މަރިޔަމް ރޫޔާ އަލީ، އަހުނާ ނިޒާރު، ޒިވާ މޫސާ ޝަފީއު، ހައްވާ މުޒްނާ ފާއިޒުއެވެ.

އަންހެން އިވެންޓުން ވެސް ރަން މެޑަލް ހޯދީ ލަންކާއެވެ. އެމީހުން ރޭސް ނިންމީ 46.48 ސިކުންތުންނެވެ. އަދި ދެވަނަ ހޯދި އިންޑިއާ ރޭސް ނިންމީ 45.08 ސިކުންތުންނެވެ.

މި މެޑަލްތަކާއެކު ސައުތު އޭޝިއަން ޖޫނިއާ މުބާރާތްތަކުގައި މިހާތަނަށް ރާއްޖޭން ހޯދި މެޑަލްތަކުގެ ޖުމްލަ އަދަދު މިވަނީ ހަތަރަކަށް އަރާފައެވެ.

މި ފަހަރުގެ މުބާރާތުގައި ރާއްޖޭގެ ދުވުންތެރިން ވަނީ ޖޫނިއާ ގައުމީ ރެކޯޑަށް ވުރެ އަވަސް ޓައިމިން އެއްގައި ބައެއް އިވެންޓްތައް ނިންމައިފަ އެވެ. އެ ރެކޯޑްތައް ރަސްމީ ވެގެންދާނީ، އެތުލެޓިކްސް އެސޯސިއޭޝަނުން ރެކްޓިފައި ކުރުމުންނެވެ.