ޖަރުމަނުގެ ލެޕްޒިގްގައި މިހާރު ކުރިޔަށްދާ ރެޑްބުލް ފޯ ޓު ސްކޯގެ ވޯލްޑް ފައިނަލްގެ ދެވަނަ ބުރުން ރާއްޖޭގެ ޗެމްޕިއަން، ދި ފުޓްސަލް ޓައުން (ޓީއެފްޓީ) ޖާގަ ހޯދައިފިއެވެ.

ހުކުރު ދުވަހު ފެށި މި މުބާރާތުގެ ގްރޫޕް ސްޓޭޖުގައި ޓީއެފްޓީ ވާދަކުރީ ވަރުގަދަ ގްރޫޕެއްގައެވެ. ދުނިޔޭގެ 25 ގައުމެއްގެ ވޯލްޑް ޗެމްޕިއަނުން ވާދަކުރާ މި މުބާރާތުގެ ރާއްޖޭގެ ޓީއެފްޓީ ހިމެނޭ ގްރޫޕްގައި އެ ޓީމުގެ އިތުރުން ދެން ހިމެނުނީ، އިންޑިއާ، އޮސްޓްރިއާ، ބްރެޒިލް އަދި އެމެރިކާއެވެ.

ފުރަތަމަ މެޗުގައި އިންޑިއާ އަތުން ރާއްޖެ 5-1 އިން މޮޅުވި އިރު، ދެވަނަ މެޗުގައި އެންމެ ފަހުގެ ޗެމްޕިއަން އޮސްޓްރިއާ އަތުން ރާއްޖެ ބަލިވީ ވަރަށް ހަނިކޮށް، 3-2 އިންނެވެ. އަދި ބްރެޒިލް މެޗުން 6-4 އިން ނާކާމިޔާބީއާ ކުރިމަތިލާން ޖެހުނު އިރު، އެމެރިކާ އަތުން ޓީއެފްޓީ ބަލިވީ 5-1 އިންނެވެ.

ދެވަނަ ބުރުގައި ޓީއެފްޓީ ކުޅޭނީ ކޮރޭޝިއާއާ ދެކޮޅަށެވެ. މި މެޗު އޮންނާނީ އާދިއްތަ ދުވަހު ރާއްޖެ ގަޑިން މެންދުރުފަހު 1:30 ގައެވެ.

ޓީއެފްޓީ ރެޑްބުލް ފޯ ޓު ސްކޯގެ ކޮލިފައިން މެޗުތައް ރާއްޖޭގެ 10 ސަރަހައްދެއްގައި ވަނީ ކުރިޔަށް ގެންގޮސްފައެވެ. އަދި މުބާރާތުގެ ފައިނަލް ބުރުގައި ޖުމްލަ 16 ޓީމުން ވަނީ ވާދަކޮށްފައެވެ. އޭގެ ތެރެއިން ނުވަ ޓީމަކީ މާލެއިން ބޭރުގައި ބޭއްވި ކޮލިފައިން ބުރުތައް ކާމިޔާބުކުރި ޓީމުތަކެވެ.

މާލެ ސަރަހައްދުން ހަތް ޓީމެއް ރާއްޖޭގެ ފައިނަލް ބުރުގައި ވާދަކޮށްފައިވާ އިރު، މި މުބާރާތުގެ ޗެމްޕިއަންކަން ޓީއެފްޓީ އިން ހޯދީ ފައިނަލުގައި ޓީމް ބަޖިޔާ ބަލިކޮށްގެންނެވެ. ޓީއެފްޓީ ޓީމުގައި ހިމެނެނީ، މުހައްމަދު ޝައްފާން (ޝާކާ)، މުހައްމަދު ވިލްފް، އިސްމާއިލް މުނީޒް، އަހުނަފް ރަޝީދު (އަހުއްކޮ) އަދި އިބްރާހިމް ނާޖިހު (ހޭޓް)އެވެ.