މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް, އާދަމް ނަޞީރާއި އެމިނިސްޓްރީގެ އެކްޓިން ޕަރމަނަންޓް ސެކެޓްރީ އާއި ދެކޮޅަށް، އެމިނިސްޓްރީގެ މުވައްޒަފުންތަކެއް، ސިވިލް ސަރވިސް ކޮމިޝަނަށާއި، ރައީސުލްޖުމްހޫރިއްޔާއަށް ޕެޓިޝަނެއް ހުށައަޅައިފިއެވެ.

އެމިނިސްޓްރީގެ ގިނަ އަދަދެއްގެ މުވައްޒަފުން ސޮއިކޮށް ހުށައެޅި އެޕެޓިޝަނުގައި ވަނީ މިނިސްޓަރ އާދަމް ނަޞީރަށާއި، އެވުޒާރާގެ އެކްޓިން ޕީއެސްގެ މައްޗަށް ގިނަ ތުުހުމަތުތަކެއްކޮށް އެފަރާތްތަކާއި މެދު ފިޔަވަޅު އަޅައިދިނުމަށް އެދިފައެވެ.

މުވައްޒަފުން ހުށައަޅާފައިވާ ޕެޓިޝަނުގައި ވަނީ، މުވައްޒަފުންގެ އިންސާނީ ކަރާމާތަށް އުނިކަން ލިބޭ ފަދަ ކަންކަން ބަހާއި އަމަލުން ކުރައްވާ ކަމުގެ ތުހުމަތު ތަކާއި، ޤާނޫނާއި ޤަވާއިދާއި ޚިލާފަށް މުވައްޒަފުންލައްވައި، މަޤާމާއި މަޤާމުގެ މަސްޢޫލިއްޔަތާއި ޒިންމާގައި ނުހިމެނޭ ކަންކަން ކުރުވާ ކަމަށާއި، އަދި މުވައްޒަފުންނާއި މެދު ތަފާތުކުރުން ގެންގުޅޭ ކަމަށް ތުހުމަތުކޮށްފައެވެ. އަދި މީގެ އިތުރުން މުވައްޒަފުންނަށް ފިޔަވަޅުއަޅައި މަޤާމުގެ މަަސައްކަތްތަކުން އެކަހެރި ކުރުމުގެ މަސައްކަތްތައްވެސް ކުރަމުންދަނީ ޤާނޫނާއި ޤަވާއިދުތަކާއި ޚިލާފަށް ކަމުގައި ޕެޓިޝަންގައި ވަނީ ބަޔާންކޮށްފައެވެ. ޕެޓިޝަނުގައި ބަޔާންކޮށްފައިވާ އިތުރު ކަންތަކުގެ ތެރޭގައި، މިނިސްޓްރީގެ މުވައްޒަފުންނަށް ކުރެވޭނެ މަސައްކަތްތައް ބޭރުން މީހުން ގެނެސްގެން ކުރުވުމާއި، އެމިނިސްޓްރީގެ މުވައްޒަފުން ނޫން މީހުން އޮފީހަށް ގެނެސް އެފަރާތްތައް ލައްވައި މަސައްކަތްތައް ކުރުވުން ފަދަ ކަންކަން ފާހަގަކޮށްފައިވެއެވެ.

މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖްއިން ކުރަމުން އަންނަ އެންމެ ބޮޑު އެއް މަސައްކަތަކީ، ރައީސުލްޖުމްހޫރިއްޔާގެ ރިޔާސީ ވަޢުދުފުޅާއި އެއްގޮތަށް، ރާއްޖޭގެ ސްކޫލުތަކުގައި ޤައުމިއްޔަތު ވަކި މާއްދާއެއްގެ ގޮތުގައި ކިޔަވައިދިނުމަށް ކުރަންޖެހޭ މަސައްކަތްތައް ކުރުމެވެ.