ސަބްސިޑީ ދިނުމުގެ އުސޫލުތަކަށް ގެންނަ ބަދަލުތައް ކުރިޔަށް އޮތް މަހެއްހައި ދުވަހުގެ ތެރޭގައި ހާމަކުރާނެ ކަމުގައި، ރައީސުލްޖުމްހޫރިއްޔާގެ އޮފީހުގެ ސީނިއަރ ސްޕޯކްސް ޕަރސަން ހީނާ ވަލީދު ވިދާޅުވެއްޖެއެވެ.

ހީނާ މިހެން ވިދާޅުވީ، މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ދެންނެވި ސުވާލަށް ޖަވާބު ދެއްވަމުންނެވެ.

ރާއްޖޭގައި މިހާރު ސަބްސިޑީ ދެވެމުން އަންނަ އުސޫލުތަކަކީ، އިޤުތިޞާދަށް އެކަމުގެ ނޭދެވޭ އަސަރު އިންތިހާއަށް ބޮޑު ކަމެއް ކަމުގައިވާތީ، ސަބްސިޑީދޭ އުސޫލުތަކަށް ބަދަލު ގެނައުމަށް ދުނިޔޭގެ މާލީ އިދާރާތަކުންވެސް ވަނީ ސަބްސިޑީދޭ އުސޫލުތައް ހަރުދަނާ ކުރުމަށް ސަރުކާރަށް ތަކުރާރުކޮށް އިލްތިމާސްކޮށްފައެވެ.

ރާއްޖޭގައި ދެވޭ ތެލުގެ ސަބްސިޑީއާއި ކާޑުގެ ސަބްސިޑިއަކީ، އެއަށް ދައުލަތުގެ ބަޖެޓުން ތިން ބިލިއަނެއްހާ ރުފިޔާ ޚަރަދު ކުރަންޖެހޭ ސަބްސިޑީތަކެކެވެ. އަދި އެހެން ދާއިރާތަކުން ދޭ ސަބްސިޑީތަކާއި އެކު ދައުލަތުން އެފަދަކަންކަމަށް ކުރާ ހޭދަ ހައެއްކަ ބިލިއަނަށް އަރައެވެ.

ހީނާ ވަލީދު ވިދާޅުވީ، ސަރުކާރުގެ މެނިފެސްޓޯއާއި އެއްގޮތަށް ސަބްސިޑީ ދިނުމުގެ އުސޫލުތަކަށް ބަދަލު ގެނެސް، އެފަދަ ސަބްސިޑީ ހައްޤުވާ ފަރާތްތަކަށް ޑައިރެކްޓް ސަބްސިޑީ ލިބޭނެ ގޮތް ހެދުމަށް ކުރަން ޖެހޭ ދިރާސާތަކާއި ކަންކަން ކުރެވެމުންދާ ކަމަށެވެ. އަދި އެކަންކަމުގެ އަލީގައި ސަރުކާރުން ގެންނާނެ ބަދަލުތައް ކުރިޔަށް އޮތް މަހެއްހައި ދުވަހުގެ ތެރޭގައި ހާމަކުރާނެ ކަމުގައިވެސް ހީނާ ވިދާޅުވިއެވެ.

ހީނާ ވިދާޅުވީ ސަރުކާރުން ބޭނުންވަނީ ސަބްސިޑީ ކަނޑާލަން ނޫންކަމަށާއި، ސަބްސިޑީ ލިބެނީ އެންމެ ހައްޤުވެރި ފަރާތްތަކަށް ކަން ކަނޑައެޅުމަށް ކަމަށެވެ.