ހޮޅޫދޫ ގެއެއްގެ ތެރޭގައި މަރުވެފައި އޮއްވައި ފެނުނު މީހާގެ މަރުގެ މައްސަލަ ތަޙްޤީޤު ކުރުމަށް އެރަށަށް ފުލުހުންގެ ޚާއްޞަ ޓީމެއް ފުރައިފިއެވެ.

ފުލުހުންގެ އިދާރާއިން ވިދާޅުވީ، މަރުގެ އެމައްސަލަ ތަޙްޤީޤު ކުރުމަށްޓަކައި ފުލުހުންގެ ޓީމެއް މިހާރު އެރަށަށް ގޮސްފައިވާ ކަމަށެވެ. މަރުގެ މައްސަލަ ފުލުހުންނަށް ރިޕޯޓްކޮށްފައި ވަނީ މިއަދު ހެނދުނު 10:10 ހާއިރު ކަމަށާއި އަންހެންމީހާ ހޮޅުދޫ ޞިއްޙީމަރުކަށް ގެންދިޔައިރުވެސް އޮތީ ނިޔާވެފައި ކަމަށް ފުލުހުން ވިދާޅުވެފައިވެއެވެ.

ޒަޚަމްތަކަކާއި އެކު ގެއެއްގެ ތެރޭގައި މަރުވެފައި އޮއްވައި ފެނުނީ އުމުރުން 50 އަހަރުގެ ދިވެހި އަންހެނެކެވެ. ހޮޅުދޫއިން މައުލޫމާތު ލިބިފައިވާ ގޮތުގައި ނިޔާވި އަންހެނަކީ، އެރަށު ނިއުލައިފް، ޒަކިއްޔާ މޫސާ މަނިކު އެވެ.

މައުލޫމާތު އެނގޭ ބައެއް މީހުން ބުނެފައިވާ ގޮތުގައި ޒަކިއްޔާއަކީ، ނަފްސާނީ މައްސަލަތަކެއްވެސް ހުރި މީހެކެވެ. ޒަކިއްޔާ މަރުވީ އޭނާގެ ކަރަށް ލިބިފައިވާ ޒަޚަމްތަކެއްގެ ސަބަބުން ކަމަށާއި އޭނާ ވެއްޓިފައި އޮތް ތަނުގެ ކައިރިން ވަޅިއެއް ފެނުނު ކަމުގައިވެސް މައުލޫމާތު ލިބިފައިވެއެވެ.

ސީރިއަސް މައްސަލައެއްގެ ގޮތުގައި މަރުގެ މިހާދިސާ ފުލުހުން ގެންދަނީ ތަޙްޤީޤު ކުރަމުންނެވެ.