ޕީޖީއަށް ރުހުން ދިނުމުގެ މަސައްކަތްތައް ކުރިޔަށް ގެންދިޔުމަށް ބުދަ ދުވަހުގެ ރޭ ދައުރުން ބޭރުގައި މަޖިލީހުގެ ޖަލްސާއެއް ބާއްވަން ނިންމައިފިއެވެ.

ސަރުކާރު ހިންގާ ޕާޓީ ޕީއެންސީގެ ބައެއް މެމްބަރުން ވިދާޅުވީ، ޕްރޮސެކިއުޓަރ ޖެނެރަލްގެ މަޤާމަށް ބޭފުޅަކު ޢައްޔަނުކުރުމަށްޓަކައި، ދައުރުން ބޭރުގައި ރައްޔިތުންގެ މަޖިލީހުގެ ޖަލްސާއެއް ބޭއްވުމަށް ޕީއެންސީގެ މަޖިލިސް މެމްބަރުން ސޮއިކުރައްވައި ރައްޔިތުންގެ މަޖިލީހުގެ ރައީސަށް ހުށައަޅުއްވާފައި ވާކަމަށެވެ.

އަދި އެޖަލްސާ މިމަހުގެ 11 ވާ ބުދަ ދުވަހުގެ ރޭ ބޭއްވުމަށް ނިންމާފައިވާ ކަމުގައިވެސް ޕީއެންސީގެ ބައެއް މެމްބަރުން ވިދާޅުވިއެވެ.

ރައްޔިތުންގެ މަޖިލީހުގެ ޤަވާއިދުގައި ބަޔާންކޮށްފައިވާ ގޮތުން ރައްޔިތުންގެ މަޖިލީހުގެ ޖަލްސާއެއް، މަޖިލީހުގެ ދައުރުން ބޭރުގައި ބޭއްވޭނީ، މަދުވެގެން މަޖިލީހުގެ ޖުމުލަ އަދަދުގެ 3/1 މެމްބަރުންގެ ސޮޔާއިއެކު މަޖިލީހުގެ ރައީސަށް ހުށައެޅުމުންނެވެ.

ރައްޔިތުންގެ މަޖިލީހުގެ މިދިޔަ ދައުރު ނިންމާލި ދުވަހު ޕްރޮސެކިއުޓަރ ޖެނެރަލްގެ މަޤާމުން ޙުސައިން ޝަމީމް ވަކިކުރި ޖަލްސާގައި މަޖިލީހުގ ރިޔާސަތުގައި އިންނެވި މަޖިލީހުގެ ނައިބު ރައީސް އަޙްމަދު ނާޒިމްވެސް ވަނީ، ދައުރުން ބޭރުގައި މަޖިލީހުގެ 2 ޖަލްސާއެއް ބާއްވަން ޖެހޭނެ ކަމުގައި ވަނީ ވިދާޅުވެފައެވެ.

ޕީޖީގެ މަގާމު އެއްވެސް ހާލަތެއްގައި ހުސްވެއްޖެނަމަ، މަގާމު ހުސްވާތާ އެންމެ ލަސްވެގެން 30 ދުވަހުގެ ތެރޭގައި އާ ބޭފުޅަކު މަގާމަށް އައްޔަން ކުރަންޖެހޭނެ ކަމަށް ގާނޫނޫގައި ބަޔާންކޮށްފައިވެއެވެ.

އެންމެ ފަހުން ޕްރޮސެކިއުޓަރ ޖެނެރަލްގެ މަޤާމުގައި ހުންނެވީ އަލްއުސްތާޛު ޙުސައިން ޝަމީމެވެ.