ޓެލެގްރާމް ޗެނަލްތައް ހަދައިގެން ބަރަހަނާ މަންޒަރުތައް ޝެއާކުރަމުން ދަނިކޮށް ހައްޔަރުކުރި ތިން މީހުން ވަނީ، ދިވެހި އަންހެނުންގެ 2 ލައްކައަށް ވުރެ ގިނަ ބަރަހަނާ ފޮޓޯ އާއި ލައްކައެއްހާ ބަރަހަނާ ވީޑިއޯ ބޭނުންކޮށްގެން 2 މިލިއަނަށްވުރެ ގިނަ ރުފިޔާ ހޯދާފައި ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

މި މައްސަލައާ ގުޅިގެން ހައްޔަރުކޮށްފައިވަނީ އދ. މަހިބަދޫ، ބަހާރުގެ، ޒުބައިރު ޢަލީ (45އ)، ކ. މާލެ، ދަފްތަރު ނަންބަރު ރސ14751 ނާޞިފް ޢަލީ (46އ) އަދި ކ. ކާށިދޫ، ސިލިންކޯ، އިސްމާޢީލް ރަބީޙް (29އ)އެވެ. މިތިން މީހުންވެސް މިހާރު ތިބީ ކޯޓު އަމުރުގެ ދަށުން ފުލުހުންގެ ބަންދުގައެވެ.

ފުލުހުންގެ އިދާރާއިން ވިދާޅުވީ، އެ މައްސަލަތަކުގައި ހައްޔަރު ކުރި ތިން މީހުންގެ ތެރެއިން، ޒުބައިރު ޢަލީ  އާއި ނާޞިފް ޢަލީ ހައްޔަރުކޮށްފައި ވަނީ، އޮގަސްޓް މަހުގެ 10 ވަނަ ދުވަހުގައި ކަމަށެވެ. އަދި އިސްމާޢީލް ރަބީޙް ހައްޔަރުކޮށްފައި ވަނީ، އޮގަސްޓް 20 ވަނަ ދުވަހުގައި ކަމަށްވެސް ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، އެމީހުން ހިންގަމުން ދިޔަ، ޓެލެގްރާމް ޗެނަލްތައް ހުއްޓުވައި ފުލުުހުންގެ ބެލުމުގެ ދަށަށް ގެންގޮސްފައިވަނީ ރޭގައި ކަމަށެވެ. މިގޮތުން ޖުމުލަ 571 ޓެލެގްރާމް ޗެނަލް ހުއްޓުވާފައި ވާއިރު އެޗެނަލްތަކަށް، 34680 މީހުން ސަބްސްކްރައިބްކޮށްފައިވާ ކަމުގައިވެސް ފުލުހުންގެ އިދާރާއިން ވިދާޅުވިއެވެ. އަދި އެޗެނަލްތަކުން ގާތްގަނޑަކަށް ދެމިލިޔަނެއްހާ ރުފިޔާ އެމީހުން ހޯދާފައިވާ ކަމުގައިވެސް ފުލުހުން ވަނީ ވިދާޅުވެފައެވެ.