މިދިޔަ ހުކުރު ދުވަހުގެ ރޭ ހުޅުމާލޭގައި ހިނގި އެކްސިޑެންޓްގައި ނިޔާވި، ލ. އިސްދޫ، ބީޗު ހައުސް ޙަސަން ސަމާޙް ސައިކަލު ދުއްވާފައި ވަނީ ވަންވޭ އާއި އިދިކޮޅަށް ކަމަށް ބުނެ، ސޯޝަލް މީޑިއާގައި ބައެއް ފަރާތްތަކުން ވާހަކަ ފެތުރި ނަމަވެސް އެފަދަ އެއްވެސް މައުލޫމާތެއް އެއްވެސް ފަރާތަކާއި ޙިއްޞާކޮށްފައި ނުވާނެ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

އެކްސިޑެންޓް ހިނގި ފުރަތަމަ ވަގުތުން ފެށިގެންވެސް، ބައެއް ފަރާތްތަކުން ވަނީ އެ އެކްސިޑެންޓް ހިނގީ ސަމާޙްގެ އިޙްމާލުކަންކަން ދެއްކުމަށް ސޯޝަލްމީޑިއާގައި ވާހަކަތައް ފަތުރަން ފަށާފައެވެ. އެކަމާއި ގުޅޭ ގޮތުން ސުވާލު ކުރުމުން ފުލުހުންގެ އިދާރާއިން ވިދާޅުވީ، ސަމާޙް މަރުވި އެކްސިޑެންޓްގެ މައްސަލައަކީ ފުލުހުން ތަޙްޤީޤު ކުރަމުންދާ މައްސަލައަަކަށް ވާތީ އެމައްސަަލަ އާއި ގުޅޭ އެއްފަދަ އެއްވެސް މައުލޫމާތެއް ފުލުހުން އެއްވެސް ފަރާތަކާއި ހިއްސާކޮށްފައި ނުވާނެ ކަމަށެވެ. އަދި އެކްސިޑެންޓް ހިނގީ ސަމާޙް ވަންވޭ އާއި އިދިކޮޅަށް ސައިކަލު ދުއްވައިގެން ކަމަށް ފުލުހުންގެ ތަޙްޤީޤަށް ފާހަގަވެފައިވާ ކަމަށް ބުނެ، ސޯޝަލް މީޑިއާގައި ފަތުރާ ވާހަކަތަކަކީ ފުލުހުން ދީފައިވާ މައުލޫމާތެއް ނޫންކަމުގެ ޔަޤީންކަންވެސް ފުލުހުން ވަނީ ދީފައެވެ.

ސަމާޙް މަރުވި އެކްސިޑެންޓް ހިނގާފައި ވަނީ، އޭނާ ދުއްވި ސައިކަލުގައި ރޭސް ކާރެއް ޖެހިގެންނެވެ. ހުޅުމާލޭގެ މަގުތަކުގައި އެއްވެސް ބެލުމެއް ނެތި އާއްމުންނަށް ނުރައްކާވާ ގޮތަށް ރޭސްކާރުތައް ދުއްވަމުން އަންނަ މައްސަލައިގައި އާއްމުން އައީ ކަންބޮޑުވުން ފާޅުކުރައްވަމުންނެވެ. އަދި ސަމާޙް މަރުވި އެކްސިޑެންޓާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، ކުރީ ސަރުކާރުގައި ހުޅުމާލޭގައި ރޭސިންގ އާއި ޑްރިފްޓިންއަށް ހުއްދަ ދީފައިވާ ސަރަހައްދުތަކުގެ ހުއްދަތަށް ބާޠިލް ކުރުމަށް އަންގަވާފައެވެ. އެކަމާއި ގުޅިގެން ރޭސް ކާރުތައް ގެންގުޅޭ ފަރާތްތަކުންނާއި ރޭސިން ޖަމިއްޔާއިން ވަނީ ކަންބޮޑުވުންފާޅުކޮށްފައެވެ.