33 ވަނަ ގައުމީ އެތުލެޓިކްސް މުބާރާތުގައި ލޯންގު ޖަމްޕުގެ ރާއްޖޭގެ ރެކޯޑު، އައްޑޫ އެތުލެޓިކްސް ޓީމުގެ އައިޝަތު ޝައިމް އަޒީޒް މުގުރާލައިފިއެވެ.

2022 ވަނަ އަހަރު ހަދާފައިވާ ލޯންގް ޖަމްޕުގެ ރެކޯޑު ޝައިމް އައުކުރީ 5.20 މީޓަރު ދުރަށް ފުންމައިގެންނެވެ. މި ރެކޯޑު އެންމެ ފަހުން އައުކުރީ ގައުމީ ގްރޯން ޕްރީ އިވެންޓްގައި، މަރިޔަމް ރޫޔާ އަލީއެވެ. ރޫޔާ ރެކޯޑު ހެދީ 5.19 މީޓަރު ދުރަށް ފުންމައިގެންނެވެ. 

މި ރެކޯޑުގެ އިތުރުން، ޝައިމް އަކީ ހައި ޖަމްޕުގެ ވެސް ރާއްޖޭގެ ރެކޯޑު އޮތް އެތުލީޓެވެ. އޭނާ އެ ރެކޯޑު އައުކުރީ މިދިޔަ އަހަރު ފެބުރުވަރީގައި ފުވައްމުލަކުގައި އޮތް އިންޓަ ސްކޫލް މުބާރާތުގެ 19 އަހަރުން ދަށުގެ އިވެންޓުގައި ވާދަކޮށްގެންނެވެ. އެއީ، 27 އަހަރު ވަންދެން މުގުރާނުލެވި އޮތް ރެކޯޑެކެވެ.