މިދިޔަ ހަފްތާގައި މާލޭގެ އެކި ތަންތަނުގައި ތަތްކުރަމުން ދިޔަ ލި ބޭ ޕޯސްޓަރަކީ، އުރީދޫގެ ޕޯސްޓަރުތަކެއްކަން އެކުންފުނިން ހާމަކޮށްފިއެެވެ.

އެކުންފުނިން ސޯޝަލް މީޑިއާގައި ހާމަކޮށްފައިވާ ގޮތުގައި އެއީ، އެކުންފުނީގެ 5ޖީ ޚިދުމަތް ޕްރޮމޯޓް ކުރުމުގެ ގޮތުން ކުރިޔަށް ގެންގޮސްފައިވާ ކެމްޕޭނެކެވެ. މިގޮތުން، ކުންފުނިން ރާއްޖޭގެ އާބާދީގެ 60 ޕަސަންޓަށް 5ޖީ ގެ ހިދުމަތް ފޯރުކޮށްދެމުން އަންނަކަން އެކުންފުނިން ވަނީ ހާމަކޮށްފައެވެ.

އެންމެ ފަހުން އެކުންފުނިން 5 ޖީގެ ޚިދުމަތް ރާއްޖޭގެ 14 އަތޮޅެއްގައި ވަނީ ފުޅާކޮށްފައެވެ. މިގޮތުން، ހއ، ދިއްދޫ އާއި އިހަވަންދޫ އަށާއި، ހދ. ކުޅުދުއްފުށީގެ އިތުރުން، ނ. ވެލިދޫއަށާއި، ރ. ދުވާފަރާއި އުނގޫފާރަށް އަދި ބ. އޭދަފުއްޓާއި، ޅ. ހިންނަވަރު އަދި ޅ. ނައިފަރާއި މާލެ އަތޮޅު ގުރައިދޫ އާއި މާފުއްޓަށް ވަނީ ޚިދުމަތް ފުޅާކޮށްފައެވެ. މީގެ އިތުރުން، އއ. ތޮއްޑޫ އާއި އެއަތޮޅު ރަސްދޫ އާއި، އދ. މާމިގިލި، އދ. މަހިބަދޫ އަދި އދ. ދަނގެތި އަދި ދ. ކުޑަހުވަދޫ އާއި ގއ. ވިލިނގިލިއްޔާއި ގދ. ތިނަދޫ އަދި ސ. ހިތަދޫއަށް ޚިދުމަތް ވަނީ ފުޅާކޮށްފައެވެ.

އުރީދޫއިން ގްރޭޓާ މާލެ ސަރަހައްދަށް 5ޖީގެ ޚިދުމަތްދޭން ފެށީ 2020 ވަނަ އަހަރުގައެވެ. 

މިހާތަނަށް މުޅި ރާއްޖޭގެ %40 އަށް އަދި 5ޖީގެ ޚިދުމަތް ފޯރުކޮށެއް ނުދެވެއެވެ. އެހެން ނަމަވެސް ރާއްޖޭގައި 5ޖީގެ އެންމެ ބޮޑު ކަވަރޭޖެއް މިހާރުވެސް ދީފައި އޮތީ އެކުންފުނިންނެވެ.