ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީންގެ މިއަހަރުގެ ރިޔާސީ އިންތިޚާބުގައި ވާދަކުރެއްވުމަށް ހުށައެޅުއްވި ކެންޑިޑެންސީ ފޯމް ބަލައި ނުގަންނަން އިލެކްޝަންސް ކޮމިޝަނުން ނިންމައިފިއެވެ.

އިލެކްޝަންސް ކޮމިޝަނުން މިގޮތަށް ނިންމީ، ރިޔާސީ އިންތިޚާބަށް ކުރިމަތިލެވޭ މީހުންގެ ކިބައިގައި ހުރުން ލާޒިމްކޮށް ދިވެހި ޖުމްހޫރިއްޔާގެ ޤާނޫނު އަސާސީއާ ރިޔާސީ އިންތިޚާބާއި ބެހޭ ޤާނޫނުގައި ކަނޑައަޅާފައިވާ މުހިއްމު ޝަރުޠުތައް ރައީސް ޔާމީންގެ ކިބައިގައި ފުރިހަމަ ނުވާތީއެވެ.

އިލެކްޝަންސް ކޮމިޝަނުން ބުނީ، ރިޔާސީ އިންތިޚާބަށް ރައީސް ޔާމީނުގެ ފަރާތްޕުޅުން ހުށައެޅުއްވި ކެންޑިޑެންސީ ފޯމާއެކު ދެއްވާފައިވާ މައުލޫމާތުގައިވެސް، ރައީސް ޔާމީނަކީ، 12 މަސްދުވަހަށް ވުރެ ދިގު ޖިނާއީ ހުކުމެއް އައިސްފައިވާ ބޭފުޅެއްކަން އެނގޭ ކަމަށެވެ. މިގޮތުން ގާނޫނުއަސާސީގެ 109 ވަނަ މާއްދާގެ (ޅ) އަށް ރިއާޔަތްކޮށް، އެ ކޮމިޝަނުން ނިންމީ ޖިނާއީ ކުށެއް ސާބިތުވެ، 12 މަސް ދުވަހަށް ވުރެ ދިގު މުއްދަތުގެ ހުކުމެއް ޔާމީންގެ މައްޗަށް އައިސްފައި ވުމާ އެކު، ޔާމީން އެ ހުކުމް ތަންފީޒުކޮށް، ނިމިފައި ނުވާ ކަން އެ މަނިކުފާނު ހުށަހަޅުއްވާފައިވާ ކުށުގެ ރެކޯޑަށް ބެލުމުން އެނގޭ ކަމަށް އިލެކްޝަންސް ކޮމިޝަނުން ކެންޑިޑެންސީ ފޯމް ބާޠިލްކޮށް ދީފައިވާ ޖަވާބުގައި ބުނެފައިވެއެވެެ.

ރައީސް ޔާމީންގެ ރަނިން މޭޓެެއްގެ ގޮތުގައި ހުށައަޅާފައިވާ، ކުރީގެ ނައިބު ރައީސް އަދި 2013 ވަނަ އަހަރުގެ ރިޔާސީ އިންތިޚާބުގައިވެސް ރައީސް ޔާމީނުގެ ރަނިން މޭޓަކަށް އިޚްތިޔާރުކުރެއްވި، ޑރ މުޙައްމަދު ޖަމީލު އަޙްމަދުގެ ޝަރުޠު ފުރިހަމަވާކަމަށް އިލެކްޝަންސް ކޮމިޝަނުން ވަނީ ނިންމާފައެވެ.

ކެންޑިޑެންސީ ބަލައި ނުގަތް މައްސަލަ އިސްތިޢުނާފަށް ހުށައަޅާނެ ކަމުގައި ޕީޕީއެމުން ވަނީ ބުނެފައެވެ. ރިޔާސީ އިންތިޚާބުގެ ކުރިންވެސް ޕީޕީއެމުން ވަނީ ރައީސް ޔާމީނަށް ރިޔާސީ އިންތިޚާބުގައި ވާދަކުރުމުގެ ފުރުޞަތު ނެތުމަކީ، ދުސްތޫރީ މައްސަލައެއް ކަމުގައި ބުނެ، އެމައްސަލަ ސްޕްރީމްކޯޓަށް ހުށައަޅާފައެވެ. އެހެން ނަމަވެސް އެއީ ދުސްތޫރީ މައްސަލައަކަށް ނުވާތީ ކޯޓުން ވަނީ އެމައްސަލަ ބޭރުކޮށްލާފައެވެ.