މި މަހުގެ 5 – 7 އަށް އެކުވެނި ދުވާ ޓްރެކުގައި ކުރިޔަށްދިޔަ 33 ވަނަ ގައުމީ އެތުލެޓިކްސް މުބާރާތުގެ އެންމެ މޮޅު އެތުލީޓުންގެ މަގާމު އިބާދުﷲ އާދަމް އާއި ފަސޫހާ އަހުމަދު ހޯދައިފިއެވެ. މިއީ މި ދެ އެތުލީޓުންނަށް ވެސް މި މުބާރާތުގެ އެންމެ ޝަރަފުވެރި އިނާމު ހާސިލްކުރެވުނު ފުރަތަމަ ފަހަރެވެ.

މުބާރާތުގެ އެންމެ މޮޅު އަންހެން އެތުލީޓުގެ މަގާމު ފަސޫހާ ހޯދީ އޭނާ ވާދަކުރި ތިން އިވެންޓުން ރަން މެޑަލް ހޯދައިގެންނެވެ. އެއީ، 400 މީޓަރު، 800 މީޓަރު އަދި 1500 މީޓަރު ދުވުމުންނެވެ. އަދި މި މުބާރާތުގައި ފަސޫހާ ވަނީ 5  މިނިޓް، 03.51 ސިކުންތުން 1500 މީޓަރުގެ ރޭސް ނިންމައިގެން، އޭނާ މިދިޔަ ޑިސެމްބަރުގައި ހަދާފައިވާ ގައުމީ ރެކޯޑު އައުކޮށްފައެވެ. މީގެ އިތުރުން 800 މީޓަރުގެ ރޭހުގައި އޭނާ ވަނީ މީޓް ރެކޯޑެއް ވެސް ހަދާފައެވެ.

ދިވެހި ސިފައިންގެ ކްލަބުގެ ފަސޫހާ، އަންހެނުންގެ 800 މީޓަރު އިވެންޓުން ރަން މެޑަލް ހޯދީ، 2 މިނިޓް، 15.96 ސިކުންތުން ރޭސް ނިންމައިގެންނެވެ. އަދި  400  މީޓަރުގެ އިވެންޓުން އޭނާ ކުރި ހޯދީ 57.22 ސިކުންތުން ރޭސް ނިންމައިގެނެވެ.

ގައުމީ މުބާރާތުގެ ކާމިޔާބަކީ ފަސޫހާއަށް ފާއިތުވެ މިދިޔަ ނުވަ މަސް ތެރޭގައި ހާސިލް ކުރެވުނު އެފަދަ ތިން ވަނަ މުބާރާތެވެ. އެގޮތުން، ގައުމީ މުބާރާތުގެ އިތުރުން، މިދިޔަ އަހަރުގެ ގައުމީ ގްރޯން ޕްރީ އާއި މި އަހަރުގެ އެސޯސިއޭޝަން ކަޕު ގައި ވެސް އޭނާ ވަނީ އެންމެ މޮޅު އެތުލީޓުގެ ނަގާމު ހޯދާފައެވެ.

އެންމެ މޮޅު ފިރިހެން އެތުލީޓުގެ މަގާމު ހޯދި އިބާދުﷲ ވަނީ 100 މީޓަރު ދުވުމާއި 200 މީތާރު ދުވުމުން ރަން މެޑަލް ހޯދާފައެވެ.

މިއީ، 2013 ވަނަ އަހަރުގެ ފަހުން، ގައުމީ މުބާރާތުގެ 100 މީޓަރުގެ ރޭސް ސާއިދު ނޫން ދުވުންތެރިއަކު ހޯދި ފުރަތަމަ ފަހަރެވެ. އެ ގޮތުން، ސާއިދުގެ މައްޗަށް މިއަދުގެ، 100 މީޓަރު ރޭހުގެ ފައިނަލުގައި، ރައުހަތު ސްޕޯޓްސްގެ އިބާދުﷲ ކުރިހޯދީ، 10.59 ސިކުންތުން ރޭސް ނިންމައިގެންނެވެ.  އަދި އޭނާ 200 މީޓަރު ރޭސް ނިންމީ، 21.69 ސިކުންތުންނެވެ.