ހުޅުމާލޭ ސެންޓްރަލް ޕާކު ވަށައިގެން އޮންނަ ބަގީޗާ މަގުގައި ރޭ ހިނގި އެކްސިޑެންޓާއި ގުޅިގެން، ރޭސިންގ އާއި ޑްރިފްޓިންއަށް ދީފައިވާ ހުއްދަ ބާޠިލްކުރައްވައިފިއެވެ.

2023 އޮކްޓޯބަރ 19 ގައި ދީފައިވާ މިހުއްދަތައް ބާޠިލުކުރަން އެންގެވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. ހުޅުމާލޭގެ ބައެއް ސަރަހައްދުތަކުގައި ރޭސް ޖެހުމަށް ހުއްދަކޮށް ސަރަހައްދުތައް މީގެ ކުރިން ކަނޑައަޅާފައި ވީ ނަމަވެސް އެފަދަ ހުރިހާ ހުއްދައެއް ބާޠިލް ކުރުމަށް ރައީސުލްމްހޫރިއްޔާ މިއަދު ވަނީ އަންގަވާފައެވެ.

މިނިންމުން ރައީސް ނިންމެވީ، ރޭ ހުޅުމާލޭ ބަގީޗާ މަގުގައި ދުއްވި ރޭސް ކާރަކުން ސައިކަލެއްގައި ޖެހި، އެ ސައިކަލު ދުއްވަން އިން މޯލްޑިވްސް ކަރެކްޝަނަލް ސަރވިސްގެ ޕްރިޒަންސް ލާންސްކޯޕްރަލް ޙަސަން ސަމާޙް ނިޔާވުމާއި ގުޅިގެންނެވެ.

ސަމާޙުގެ މަރުގެ ހާދިސާއަށް ފަހު، ހުޅުމާލެއާ މާލޭގައި އާދަޔާ ޚިލާފަށް ބާރު ސްޕީޑުގައި ސްޕޯޓްސް ކާރުތައް ދުއްވާ މައްސަލައިގައި އާއްމުން ވަނީ ނުރުހުންފާޅުކޮށް، އެކަން ހުއްޓުވައި ދިނުމަށް ސޯޝަލްމީޑިއާގެ މަންސަތަކުގައި ސަރުކާރަށް ގޮވާލާފައެވެ.