ސަމާޙް ނިޔާވި، އެކްސިޑެންޓާއި ގުޅިގެން ކާރު ދުއްވި،  ސ. ހިތަދޫ، ވައިލެޓްފެހި، މުޙައްމަދު ވިސާމް ޞިދުޤީ (26އ) ހައްޔަރުކޮށް، ޝަރީއަތް ނިމެންދެން އޭނާ ބަންދުކޮށްފިއެވެ.

ފުލުހުންގެ އިދާރާއިން ވިދާޅުވީ، އެކްސިޑެންޓް ހިނގި އިރު ކާރު ދުއްވަން އިން، މުޙައްމަދު ވިސާމް ޞިދުޤީއަކީ، ކާރު ދުއްވުމުގެ ލައިސަންސް އޮންނަ މީހެއް ނޫނެވެ. އޭނާ ރޭ ހައްޔަރުކޮށް މިއަދު އޭނާގެ ބަންދާއ މެދު ގޮތެއް ނިންމުމަށް ކްރިމިނަލް ކޯޓަށް ހާޟިރު ކުރުމުން ކޯޓުން ވަނީ ޝަރީއަތް ނިމެންދެން އޭނާ ބަންދުކޮށްފައި ބެހެއްޓުމަށް އަމުރުކޮށްފައެވެ.

ލ. އިސްދޫ ބީޗް ހައުސް، ޙަސަން ސަމާޙް (23އ) ނިޔާވީ، ރޭ 2:48 ހާއިރު، ހުޅުމާލެ ސެންޓްރަލް ޕާކު ކައިރީ މަގުން އެހެން މީހަކާއި އެކު ދުއްވާފައި ދަނިކޮށް، މުޙައްމަދު ވިސާމް ޞިދުޤީ ދުއްވި ރޭސް ކާރު، ފަހަތުން އައިސް ސަމާޙްގެ ސައިކަލުގައި ޖެހިގެންނެެވެ. އެހާދިސާގައި ސަމާޙްގެ ފަހަތުގައި ސައިކަލުގައި އިންމީހާއަށް މާބޮޑު އަނިޔާއެއް ނުލިބި ސަލާމަތްވިއެވެ. އެހެން ނަމަވެސް ސަމާޙް މަރުވާން ދިމާވީ، އެކްސިޑެންޓްގައި ވިއްސައިގެން ގޮސް އޭނާ ބޯ ޕޭވްމެންޓް އަރިމަތިން ކޮންކްރީޓް ގަނޑުގައި ޖެހިގެން ލިބުނު ސީރިއަސް އަނިޔާތަކާއި ގުޅިގެންނެވެ. ސަމާހުގެ ބޮލުގެ ކަނާތް ފަރާތުން ކަނާތު ލޮލާއި ނިއްކުރިއާ ދިމާއިން ވަރަށް ބޮޑަށް ޒަޚަމްވިއެވެ.

ހާދިސާ އާއި ގުޅިގެން ހުޅުމާލެ ހޮސްޕިޓަލަށް ސަމާޙް ގެންދެވުނުތާ ކުޑަ ވަގުތުކޮޅެއްގެ ތެރޭގައި އޭނާ ވަނީ ނިޔާވެފައެވެ.

އެކްސިޑެންޓުގެ މައްސަލަ ފުލުުހުން ގެންދަނީ ތަޙްޤީޤު ކުރަމުންނެވެ.