އަލް-އަޤްސާ މިސްކިތަށް އިސްރާއީލުން މެދުނުކެނޑި ދެމުންގެންދާ ހަމަލާތަކާއި، އަލް ޙަރަމްޝަރީފްގެ ތެރެެއަށް އިޒްރާއީލުގެ ސިޔާސީ ފަރާތްތަކުން ވަނުން، ރާއްޖޭގެ ފޮރިންގ މިނިސްޓަރ ކުއްވެރި ކުރައްވައިފިއެވެ.

މިނިސްޓަރ ޢަބުދުﷲ ޝާހިދު މިކަން ކުއްވެރި ކުރެއްވީ، އޯގަނައިޒޭޝަން އޮފް އިސްލާމިކް ކޯޕަރޭޝަންގެ (އޯ.އައި.ސީ.) ޚާރިޖީ ވަޒީރުންގެ ފެންވަރުގެ ބޭފުޅުންގެ މެދުގައި ހޯމަ ދުވަހު ވަރޗުއަލްކޮށް ބޭއްވި އެކްސްޓްރާ-އޯޑިނަރީ ބައްދަލުވުމުގައި ކުރެއްވި ތަޤުރީރުގައެވެ. ދާދިފަހުން، އިޒްރޭލުގެ ނެޝަނަލް ސެކިއުރިޓީ މިނިސްޓަރު ވަނީ، އަލް އަޤުޞާ މިސްކިތުގެ ޙަރިންމަ ތެރެއަށް ވަދެފައެވެ.

މިނިސްޓަރ ޝާހިދު ވިދާޅުވީ، ފަދަ އަމަލުތަކަކީ މެދުއިރުމަތީގެ ސުލްހަމަސަލަސްކަން ގެއްލުވާލަ ފަދަ އަމަލެއްކަންވެސް ފާހަގަ ކުރެއްވިއެވެ. އަދި، އެ މަނިކުފާނުގެ ތަޤްރީރުގައި ދިވެހި ސަރުކާރާއި ރައްޔިތުން އަބަދުމެހެން ފަލަސްތީނުގެ ރައްޔިތުންނާއެކު ވާނެކަމުގައި ވިދާޅުވެ، ފަލަސްތީނުގެ ބިންތަކަށް އިސްރާއީލުން ވެރިވެގަތުން ނިމުމަކަށް ގެނެސް، ފަލަސްތީނުގެ މިނިވަން ދައުލަތެއް ޤާއިމްކޮށް، 1967 ވަނަ އަހަރުގެ ކުރީގެ ބޯޑަރާ ހިސާބަށް އިސްރާއީލުން ފަހަތަށް ޖެހުމަށް ބާރުއަޅާ، ފަލަސްތީނުގެ ދައުލަތުގެ ވެރިރަށުގެ ގޮތުގައި އިރުމަތީ ޤުދުސް އޮންނަން ޖެހޭ ކަމުގައި ވިދާޅުވިއެވެ.

މިނިސްޓަރ ޝާހިދުގެ ތަޤުރީރުގައި އެންމެ މުހިއްމު ކަމެއްގެ ގޮތުގައި އަލި އަޅުވާލެއްވީ، ޑެންމާކްގައި ހުންނަ އިރާޤްގެ އެމްބަސީ ކުރިމަތީގައި ކީރިތި ޤުރުއާނުގެ މުޞްޙަފް އަންދާލި މައްސަލައަށެވެ. އެކަން ކުއްވެރިކުރައްވައި، އެފަދަ އަމަލުތައް ތަކުރާރުވިޔަނުދިނުމަށް އެޅިދާނެ ފިޔަވަޅުތަކާ ގުޅޭގޮތުން، އޯއައިސީގެ މެމްބަރުން ވަނީ މަޝްވަރާކުރައްވާފައެވެ. 

މި ބައްދަލުވުން ނިންމާލާފައި ވަނީ، އޯ.އައި.ސީ.ގެ މެމްބަރު ޤައުމުތަކުގެ މެދުގައި މި ދެ އަމަލުތައް ކުށްވެރިކޮށް، އެކަންކަމާއި ދެކޮޅަށް މެދުކެނޑުމެއްނެތި މަސައްކަތް ކުރާނެ ކަމުގެ ޔަޤީންކަން ހާމަކުރަމުންނެވެ. މިބައްދަލުވުމުގައި ވަނީ އެކަންކަމާއި ގުޅޭ ގޮތުން ދެ ޤަރާރެއްވެސް ފާސްކޮށްފައެވެ.