މިހާރު ކުރިޔަށްދާ ގައުމީ އެތުލެޓިކްސް މުބާރާތުގެ 100 މީޓަރު ދުވުމުން، 2013 ވަނަ އަހަރުން ފެށިގެން މި އިވެންޓު ކާމިޔާބު ކުރަމުން އަންނަ ހަސަން ސާއިދު ފަހަތަށް ޖައްސާލުމަށްފަހު، އިބާދުﷲ އާދަމް މި ރޭސް ކާމިޔާބު ކޮށްފިއެވެ.

އިބާދުﷲ މި އިވެންޓުގެ ރަން މެޑަލް ހޯދާފައި ވަނީ 10.59 ސިކުންތުން ރޭސް ނިންމައިގެނެވެ. މި އިވެޓުން ދެވަނަ ހޯދި ސާއިދުއަށް ރޭސް ނިންމުނީ 10.67 ސިކުންތުންނެވެ. އަދި މި ރޭހުން ލޯ މެޑަލް ކާމިޔާބު ކޮށްފައިވަނީ މުހައްމަދު މިންހާލް ޝާމިންއެވެ. އޭނާ ރޭސް ނިންމާފައިވަނީ 10.74 ސިކުންތުންނެވެ.

އިބާދުﷲއަކީ ޖެމެއިކާގައި ޓްރެއިނިން ހަދަމުންދިޔަ ދުވުންތެރިއެކެވެ. އަދި އެއަށްފަހު އަނިޔާގެ ސަބަބުން މިދިޔަ އަހަރުގެ ގައުމީ މުބާރާތާއި، އަދި ބައިނަލްއަގްވާމީ ދެ މުބާރާތް ކަމުގައިވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި އޭޝިއަން ގޭމްސް ވެސް އޭނާއަށް ގެއްލުނެވެ. ނަމަވެސް އަނިޔާއިން ރަގަޅުވެ، ޓައިމް ޓްރަޔަލްއިން ކުރި ހޯދައި އޭނާ ވަނީ ޕެރިސް އޮލިމްޕިކްސްގައި ރާއްޖެ ތަމްސީލުކޮށްފައެވެ.

100 މީޓަރު ދުވުމުގެ ގައުމީ ރެކޯޑު އަދިވެސް އޮތީ ސާއިދުގެ އަތުގައެވެ. އެއީ އޭނާ 2016 ވަނަ އަހަރު 10.33 ސިކުންތުން 100 މީޓަރު ދުވެގެން ގާއިމްކޮށްފައިވާ ރެކޯޑެކެވެ.