ފުޅާދާއިރާއެއްގައި ކަޅު ބާޒާރުގައި ޑޮލަރުގެ ވިޔަފާރި ކުރަމުންދާ 05 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

މޯލްޑިވްސް އިމިގްރޭޝަނުން ވިދާޅުވީ، ޓާސްކު ފޯސް އަށް ލިބުނު މަޢުލޫމާތެއްގެ އަލީގައި، އިމިގްރޭޝަނާއި ފުލުހުން ގުޅިގެން، މިއަދު ވަނީ ހާއްސަ ރެއިޑެއް ކުރިއަށް ގެންގޮސްފައިވާ ކަމަށެވެ. މި ރެއިޑުގައި ގަވާއިދާ ހިލާފަށް، ފުޅާދާއިރާއެއްގައި ކަޅު ބާޒާރުގައި ޑޮލަރުގެ ވިޔަފާރި ކުރަމުންދާ 05 ބިދޭސީއަކު ވަނީ އިމިގްރޭޝަން ބެލުމުގެ ދަށަށް ގެނެސްފައި ކަމަށާއި، މި އޮޕަރޭޝަނާއި ގުޅޭ އިތުރު މައުލޫމާތު ހާމަކުރާނެ ކަމުގައި އިމިގްރޭޝަނުން ވަނީ ވިދާޅުވެފައެވެ. އިމިގްރޭޝަނުން ވިދާޅުވީ، އެ މީހުން އަތުން ގިނަ އަދަދެއްގެ ފައިސާ އަދި ޑެބިޓް/ކްރެޑިޓް ކާޑު ތަކެއްވެސް ފެނިފައިވާ ކަމަށެވެ.

ރާއްޖޭގައި އުޅޭ ބިދޭސީން، ޤަވާއިދާއި ޚިލާފަށް ރާއްޖޭގައި ޑޮލަރުގެ ވިޔަފާރި ހިންގަމުންދާއިރު، އިއްޔެވެސް ވަނީ، މިދިޔަ މަހު، ޤަވާއިދާއި ޚިލާފަށް 81000 ޑޮލަރު ރާއްޖެއިން ބޭރުކުރަން އުޅުނު ބަނގުލަދޭޝް މީހަކު އޭވިއޭޝަން ސެކިއުރިޓީ ކޮމާންޑްގެ އޮފިސަރުން ވަނީ އަތުލައިގަނެފައެވެ.