ސަރުކާރުގެ ކުންފުނިތަކުގެ ތެރެއިން މުވައްޒަފުންނަށް ޑޮލަރުން މުސާރަ ދެމުން އައި ކުންފުނިތަކުން، ޑޮލަރުން މުސާރަ ދިނުން ހުއްޓާލުމަށް، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ކުންފުނިތަކަށް އަންގައިފިއެވެ.

ޕީސީބީން މިގޮތަށް އަންގާފައި ވަނީ، ކުންފުނިތަކުން ޚަރަދުކުޑަކުރުމުގެ ފިޔަވަޅުތައް އެޅުމަށް އަންގައި ނެރުނު ސަރކިއުލާގައެވެ. މިސަރކިއުލާގައި އަންގާފައިވާ ފިޔަވަޅުތައް، މިއަދުންފެށިގެން ތަންފީޒް ކުރަމުން ދިޔުމަށްވެސް ޕީސީބީން ވަނީ އަންގާފައެވެ. 

ޕީބީސީގެ ސަރކިއުލާގައި މައިގަނޑު ހަތަރު ދާއިރާއަކުން ޚަރަދުތައް ކުޑަކުރުމަށް ވަނީ އަންގާފައެވެ. އޭގެ ތެރޭގައި ދަތުރުތަކަށް ކުރާ ޚަރަދާއި، މުވައްޒަފުންނަށް ކުރާ ޚަރަދާއި، އެހެނިހެން ޚަރަދު ހިމެނެއެވެ.

މުވައްޒަފުންނަށް ކުރާ ޚަރަދު ކުޑަކުރުމުގެ ގޮތުން ޑޮލަރުން މުސާރަ ދިނުން ހުއްޓާލުމަށް އެންގުމުގެ އިތުރުން، މުވައްޒަފުންގެ މުސާރަ އާއި އިނާޔަތްޔަކަށް ބަދަލު ނުގެނައުމާއި، އިތުރު މުވައްޒަފުން ނުނެގުމަށާއި، އިތުރުގަޑީގައި މަސައްކަތް ނުކުރުވުމަށްވެސް ވަނީ އަންގާފައެވެ. އަދި ކުންފުނިތަކުގެ މަސައްކަތްތައް އައުޓްސޯސްކޮށްގެން ކުރުން ހުއްޓާލުންވެސް ހިމެނެއެވެ.

މީގެ އިތުރުންވެސް އެހެން ބައެއް ފިޔަވަޅުތައް އެޅުމަށް ޕީސީބީން ވަނީ އަންގާފައެވެ.

ސަރުކާރުގެ ކުންފުނިތަކުން ޑޮލަރުން މުސާރަ ދިނުން ހުއްޓާލުމަށް އެންގި އިރު، ސަރުކާރުގެ ކުންފުނިތަކުގެ ތެރެއިން، މުވައްޒަފުންނަށް ޑޮލަރުން މުސާރަދެމުން އައި ހަމައެކަނި ކުންފުންޏަކީ، އެމްއޭސީއެލްއެވެ. ޕީސީބީގެ މިއެންގުމާއި ގުޅިގެން އެކުންފުނީގެ މުވައްޒަފުންނަށް ޑޮލަރުން ދެމުން އައި މުސާރަ ހުއްޓާލަންޖެހޭނެއެވެ. 

ޕީސީބީން މިފިޔަވަޅުތައް އެޅުމަށް ސަރުކާރުގެ ކުންފުނިތަކަށް އަންގާފައި ވާއިރު، ދައުލަތުގެ މާލީ ހާލަތު އިންތިހާއަށް ގޯސްވެ ޑޮލަރު ލިބުން ވަނީ ވަރަށް ބޮޑަށް ދަތިވެފައެވެ.