އެމްއެންޑީއެފްގެ ތަމްރީންތަކެއްގައި، އުޅެނިކޮށް މިޔަރެއް ދަތް އެޅުމުގެ ސަބަބުން، އެކަށީގެންވާ ފަރުވާ ނުލިބި ނިޔާވި، އެމްއެންޑީއެފްގެ ކޯޕްރަލް ރ. އުނގޫފާރު ނިއުލައިފް، މުޙައްމަދު ޒައިދާންގެ މަރާއިގުޅޭ ހުރިހާ މައުލޫމާތެއް އެމްއެންޑީއެފުން ނުދީ ހިފަހައްޓައިފިއެވެ.

އެހާދިސާއަށް ތިން މަސްވެގެން ދިޔައިރުވެސް، ހާދިސާއި ގުޅިގެން ކުރެވުނު ސުވާލުތަކަށް ޖަވާބު ނުދިނީ ކީއްވެގެން ކަމެއް އެމްއެންޑީއެފުން ހާމަކޮށްފައެއް ނުވެއެވެ. ޒައިދާންގެ ގައިގައި މިޔަރު ދަތްއެޅުމާއި ހިސާބުން ފެށިގެން އޭނާ މަރުވެ ވަޅުލުމާއި ހަމައަށް އެމްއެންޑީއެފުން އަމަލުކުރި ގޮތާއި މެދު އެމްއެންޑީއެފްގެ ބައެއް އިސް އޮފިސަރުންވެސް ނުރުހުންފާޅުކޮށްފައިވާކަން އެނގިފައިވެއެވެ. 

ޒައިދާންގެ މަރުގެ ހާދިސާ އާއި ގުޅިގެން އެމްއެންޑީއެފުން އެތެރޭގެ ތަޙްޤީޤެއް ހިންގާފައިވާ ކަމަށް ބުނެފައި ވާއިރު، އެތަޙްޤީޤަށް ފާހަގަވީ ކޮންކަމެއް ކަމެއްވެސް އެމްއެންޑީއެފުން ހާމަކޮށްފައެއް ނުވެއެވެ. އަދި ޒައިދާންގެ މަރުގެ މައްސަލަ، ސަރުކާރުގެ ކަމާއި ބެހޭ އެއްވެސް މުއައްސަސާއަކުން ބަލައި ތަޙްޤީޤުކޮށްފައެއް ނުވެއެވެ.

ޒައިދާންގެ މަރާއި، އެމްއެންޑީއެފުން ޖަވާބުދޭން ބޭނުންނުވި ސުވާލުތައް!

ޒައިދާން މަރުވީ މިއަހަރުގެ ޖޫން މަހުގެ 2 ވަނަ ދުވަހު، ހައްދުންމަތީ މާވަށު ކައިރިން މާކަނޑުގެ ސަރަހައްދުގައި އޭނާ އޮއްވައި މިޔަރެއް ދަތްއެޅުމުގެ ސަބަބުން ލިބުނު ޒަޚަމްތަކަށް އެކަށީގެންވާ ފަރުވާ ނުލިބި ލަސްވުމާއި ގުޅިގެން ކަން ބެލެވިފައިވެއެވެ.

ޒައިދާން ނިޔާވި އިރު އޭނާ ދިވެހި ސިފައިންގެ ތެރޭގައި ޚިދުމަތް ކުރަންފެށިތާ 4 އަހަރާއި 11 މަހާއި 13 ދުވަސް ވަނީ ވެފައެވެ.