އަންހެނަކު ރަހީނުކޮށް، މަރާލާނެ ކަމުގެ އިންޒާރު ދެމުން ދަނިކޮށް ފުލުހުން ހައްޔަރު ކުރި، އަޠުހަރު ޖަލުގޮޅީގައި ބަންދުކޮށްފައި ހުއްޓައި އަމިއްލައަށް މަރުވާން މަސައްކަތްކުރި، ށ. މިލަންދޫ ހެޕީލޭންޑް، އާދަމް އަޠުހަރު (32އ) މަރުވެއްޖެއެވެ.

ފުލުހުން ހާމަކޮށްފައިވާ ގޮތުގައި އަޠުހަރު މަރުވީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ފަރުވާ ދެމުން ދަނިކޮށް މިއަދު 16:08 ގައެވެ.

އަޠުހަރު ޖަލުގޮޅީގައި ބަންދުކޮށްފައި ހުއްޓައި އަމިއްލައަށް މަރުވާން މަސައްކަތްކުރީ، ސޯޓެއްގެ ނާޑުވާއެއް ބޭނުންކޮށްގެން ކަމުގައި ހޮސްޕިޓަލާއި ހަވާލާދީ ބައެއް މީހުން ވަނީ ބުނެފައެވެ.

އެ ހާދިސާ އާއި ގުޅޭ ގޮތުން ފުލުހުން އާންމުކުރި މައުލޫމާތުގައި ބުނެފައި ވަނީ، ށ. މިލަންދޫ ހެޕީލޭންޑް، އާދަމް އަޠުހަރު (32އ) ދޫނިދޫގައި އޭނާ ބަންދުކޮށްފައި ހުރި ޖަލުގޮޅި ތެރޭގައި ދަންޖެހިފައި ހުއްޓައި ފެނުނީ އާދީއްތަ ދުވަހުގެ ރޭގެ 19:02 ގައެވެ. އަދި ދޫނިދޫ ކުލިނިކްގައި އޭނާއަށް ފަރުވާ ދިނުމަށްފަހުގައި، ރޭ 19:25ގައި އައިޖީއެމް ހޮސްޕިޓަލަށް ގެނެސް ފަރުވާދޭން ފެށުނު ކަމުގައި ފުލުހުން ހާމަކުރައްވާފައި ވެއެވެ. އެހެން ނަމަވެސް އަޠުހަރު ފެނުނީ، ދަންޖެހުނުތާ ކިހާ އިރެއް ފަހުން ކަމެއް ފުލުހުން ހާމައެއް ނުކުރައްވައެވެ.