ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ޕަބްލިކް ކުންފުންޏަކަށް ހަދަން އުޅޭކަން ސަރުކާރުން ހާމަކުރައްވައިފިއެވެ.

މިކަން ހާމަކުރެއްވީ، އާދީއްތަ ދުވަހު، ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ހައުސިންގ މިނިސްޓަރ ޑރ. ޢަލީ ޙައިދަރެވެ.

އާދިއްތަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގައި ވަނީ، އެޗްޑީސީގެ ދަށަށް އެފްޑީސީ ބަދަލުކޮށް އެފްޑީސީއަކީ، އެޗްޑީސީގެ ސަބްސިޑިއަރީ ކުންފުންޏެއްގެ ގޮތުގައި ހިންގުމަށް ނިންމާފައެވެ. އަދި އެޗްޑީސީގެ ޙިއްޞާ އާއްމުންނަށް ވިއްކުމާއި މެދު ވަޒީރުންގެ މަޖިލީހުގައި މަޝްވަރާކުރެވުނު ކަމަށާއި، އެހެން ނަމަވެސް އެކަމަށް އިއްޔެ ވަކިގޮތެއް ނިންމިފައި ނުވާކަން ޑރ. ޢަލީ ހައިދަރު ފާހަގަކުރެއްވިއެވެ.

ޑރ. ޢަލީ ހައިދަރު ވިދާޅުވީ އެބަދަލުތައް ގެނައުމުގެ ދިރާސާތައް ކުރެއްވުމަށްފަހު އެކަން ސަރުކާރުން ޢާއްމުކޮށް ރައްޔިތުންނާއި ޙިއްޞާ ކުރައްވާނެއެވެ.

ހައުސިންގ ޑިވޮލޮޕްމެންޓް ކޯޕަރޭޝަނަކީ،  އެންމެ ފުރަތަމަ ހުޅުމާލެ ޑިވެލޮޕްމެންޓް ކޯޕަރޭޝަންގެ ނަމުގައި އުފެއްދެވި ކުންފުންޏެވެ. ސަރުކާރުގެ ކުންފުނިތަކުގެ ތެރެއިން އެޗްޑީސީގެވެސް މާލީ ޙާލަތު ވަނީ ގޯސްވެފައި ކަމަަށް އެނގިފައިވެއެވެ.