ސިންގަޕޫރާއި ދުބާއީ އަދި މެލޭޝިއާ ނަމޫނާއަކަށް ބަލައިގެން ރާއްޖޭގައި، އިންވެސްޓާ ރެޒިޑެންސީ ޕްރޮގްރާމެއް ފަށަން ނިންމާފައިވާ ކަމުގައި ސަރުކާރުން ހާމަކުރައްވައިފިއެވެ. 

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ، ރާއްޖޭގައި ކުރިން ހިންގަމުން އައި ކޯޕަރޭޓް ރެސިޑެންސީ ޕްރޮގްރާމްތައް ފުޅާކޮށް، ހިންގުމަށް ނިންމައި އިއްޔެ ބޭއްވި ވަޒީރުންގެ މަޖިލީހުގައި އެކަމާއި ގުޅޭ ގޮތުން މަޝްވަރާކުރައްވާފައިވާ ކަމަށެވެ.

މިނިސްޓަރ ސަޢީދު ވިދާޅުވީ، އެކަން ކުރާނީ، ރާއްޖެއިން ބޭރުގެ ތަޖުރިބާހުރި ފަރާތްތަކާއި ގުޅިގެން ކަމުގައިވެސް މިނިސްޓަރ ސަޢީދު ވިދާޅުވިއެވެ.

ކުރީ ސަރުކާރުގައިވެސް އެފަދަ ޕްރޮގްރާމެއް ހިންގުމަށް ދެކެވުނު ވާހަކަތަކަށް މަޖިލީހުގެ ތެރެއިން މިހާރުގެ ސަރުކާރުގައި ތިއްބެވި ބޭފުޅުން ހުރަސް އެޅުއްވިއެވެ. މާވަށު ދާއިރާގެ މެމްބަރުކަމުގެ މަޤާމުގައި އޭރު ހުންނެވި، މިހާރުގެ އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ، އޭރުގައި އެކަމާއި ދެކޮޅަށް މަޖިލީހުގެ ތެރޭގައި ވާހަކަތައް ދެކެވިގެން ދިޔައިރު އެކަން ކުރާނެ ގޮތުގެ ތަފްޞީލްތަކެއް ނެތް ކަމަށެވެ. 

އިންވެސްޓާ ރެޒިޑެންސީ ޕްރޮގްރާމަކީ، ރާއްޖޭގައި އިންވެސްޓް ކުރާ ފަރާތްތަކަށް ރާއްޖެއިން ބިމާއި ގެދޮރުގަނެގެން ރާއްޖޭގައި ދިރިއުޅެވޭ ގޮތަށް ފަރުމާކުރާ ޕްރޮގްރާމެވެ. އެހެން ނަމަވެސް ސަރުކާރުން އެޕްރޮގްރާމް ހިންގާނޭ ގޮތުގެ ތަފްޞީލްތަކެއް އަދި ހާމައެއް ނުކުރެއެވެ.